जळगाव, (प्रतिनिधी) : शहरातील राजमालती नगरामध्ये आपापसात असलेल्या जुन्या वादातून दोन गटांमध्ये तुफान हाणामारी झाली यात एकाचा मृत्यू झाल्याचा प्रकार आज बुधवारी सकाळी पहाटे ६ वाजता घडला. दरम्यान या घटनेत चार जण गंभीर जखमी झाले आहे.
सिद्धार्थ माणिक वानखेडे (वय वर्ष ३६ रा. राज मालती नगर, जळगाव) असे मयत तरुणाचे नाव असून मजुरी काम करून तो परिवाराचा उदरनिर्वाह करीत होता. सिद्धार्थ वानखेडे याच्यावर पूर्वी हृदयासंबंधी बायपास सर्जरी झाली होती, दरम्यान हाणामारीत छातीवर मार लागल्याने त्याचा मृत्यू झाला असल्याचा अंदाज व्यक्त केला जात आहे.
या घटनेत विशाल अजय सुरवाडे (वय २८), जानू संजू पटेल (वय २०), फैजान राजू पटेल (वय २४) आणि मयूर हाजी बिस्मिल्ला पटेल (वय ४२) सर्व रा. राजमालती नगर हे सर्व जखमी झाले आहेत. जखमींना शासकीय वैद्यकीय महाविद्यालयात उपचारासाठी दाखल करण्यात आले आहे. यात सिद्धार्थ वानखेडे याला वैद्यकीय अधिकाऱ्यांनी तपासून मयत घोषित केले.
घटनेची माहिती मिळताच डीवायएसपी संदीप गावित, पोलीस निरीक्षक अनिल भवारी, शनिपेठ चे निरीक्षक रंगनाथ धारबळे यांचा सह पोलीस कर्मचारी घटनास्थळी व रुग्णालयात माहिती घेण्यासाठी दाखल झाले.
या प्रकरणातील सात ते आठ जणांना पोलिसांनी ताब्यात घेतले असून या मारहाणीचा राजकिय, निवडणुक किंवा मतदानाशी कोणताही संबंध नसल्याची माहिती पोलीस अधीक्षक महेश्वर रेड्डी यांनी दिली आहे. तसेच नागरिकांनी कुठल्याही अफवांना बळी न पडता मतदानासाठी उस्फूर्तपणे सहभागी व्हावे असे आवाहन केले आहे. या घटने संदर्भात शहर पोलीस ठाण्यात गुन्हा दाखल करण्याचे काम सुरू असल्याचे देखील त्यांनी सांगितले.
