जळगाव, (प्रतिनिधी) : महाराष्ट्राची लोप पावत चाललेली संस्कृती टिकवण्यासाठी ग्रामीण भागातील लोक संस्कृती मोठ्या श्रद्धेने आजही सांभाळतांना दिसून येतात. महाराष्ट्र या उत्सव परंपरेत अग्रस्थानी आहे. दरम्यान विद्यार्थ्यांना विविध सण उत्सवाची माहिती व्हावी यासाठी मेहरूण मधील संत ज्ञानेश्वर विद्यालयात भुलाबाईची स्थापना करण्यात आली आहे.
यावेळी शाळेमध्ये भुलाबाई-भुलोजीच्या मातीच्या मूर्ती प्रस्थापित करून गाणी गायली गेली. भुलाबाई कथा कला प्रकार हा मुलींना सासरी कस वागवावं याची शिकवण देते कारण सासर म्हणजे फक्त एक कुटूंब नाही तर समाज आहे आणि भुलाबाईच्या स्वरूपातील प्रत्येक मुलगी दोन कुटूंबांना एकत्र करून भावी आदर्श समाजाचे सृजन करणारा एक दुवा असल्याचे मुख्याध्यापक मुकेश नाईक यांनी सांगितले.
खान्देशात शिवपार्वतीच्या रूपातून भुलाबाई अवतरतात. खरंतर हे स्त्री मनाचा भाबडा वेध घेत स्त्रियांना मुक्त व्हायला शिकविणारे, स्त्री भावनांचा तरंग सांगणारे उत्सव, सर्जनोत्सव म्हटले जाते.
