चाळीसगाव तालुक्यातील वाकडी येथील घटना
चाळीसगाव (प्रतिनिधी) : शेतात तुटलेल्या वीज तारेचा धक्का लागून शेतात बकऱ्यांसाठी चारा घेण्यास गेलेल्या १२ वर्षीय मुलाचा जागेवरच दुर्दैवी मृत्यू झाल्याची घटना शुक्रवारी सकाळी वाकडी शिवारात घडली. या घटनेत मुलाचे वडीलदेखील थोडक्यात बचावले. बापाच्या डोळ्यादेखत मुलाचा मृत्यू झाल्याची हृदयद्रावक घटना घडल्याने सर्वत्र हळहळ व्यक्त होत आहे.
महेश अनिल सूर्यवंशी असे मयत बालकाचे नाव आहे. दरम्यान आमदार मंगेश चव्हाण हे वाकडी गावात आले होते. आमदार चव्हाण यांना घटनेची माहिती मिळताच त्यांनी तत्काळ क्षणाचाही विलंब न करता घटनास्थळ गाठले. घटनेचे गांभीर्य ओळखून त्यांनी उपस्थित वीज वितरण कंपनी व पोलीस प्रशासन यांना सूचित केले. दरम्यान पोलिसांनी घटनेचा पंचनामा केला.
झालेली घटना अतिशय दुर्दैवी असून यात जे कुणी दोषी आढळतील त्यांच्यावर कारवाई करण्याच्या सूचना आमदार मंगेश चव्हाण यांनी यावेळी दिल्या. महेशच्या दुर्दैवी मृत्यूने सूर्यवंशी कुटुंबावर जो दुःखाचा डोंगर कोसळला आहे, हे नुकसान न भरून निघणारे आहे. मात्र वीज वितरण कंपनी व शासनाकडून तसेच वैयक्तिक पातळीवर जास्तीत जास्त मदत मयताच्या कुटुंबियांना मिळवून देण्याचे आश्वासन यावेळी आमदार चव्हाण यांनी दिले.
