जामनेर | दि. ०५ ऑगस्ट २०२४ | तालुक्यातील गोद्री येथे कौटुंबिक वाद विकोपाला जाऊन पतीने पत्नीला केलेल्या बेदम मारहाणीत तिचा मृत्यू झाल्याची धक्कादायक घटना उघडकीस आली आहे. या प्रकरणी जामनेर पोलीस स्टेशनला खुनाचा गुन्हा दाखल करण्यात आला आहे. तर दुसरीकडे जामनेर उपजिल्हा रुग्णालयात सोमवारी आज मयत महिलेच्या माहेरच्या मंडळींनी सासरच्या मंडळींना मारहाण करण्याचा प्रयत्न केला.
काजल विशाल चव्हाण (वय २४, रा. गोद्रि ता. जामनेर) असे मयत विवाहितेचे नाव आहे. काजल ही पती विशाल, सासू-सासरे यांच्यासह राहत होती. काही महिन्यांपूर्वीच विशाल आणि काजलचा विवाह झाला असून गेल्या १ महिन्यापासून दोघं पती-पत्नीमध्ये कौटुंबिक विषयावरून वादविवाद होते. हे वाद मिटवण्यासाठी कुटुंबातील काही सदस्यांनी प्रयत्न देखील केला होता. मात्र रविवार दि. ४ ऑगस्ट रोजी रात्री ९ वाजेच्या सुमारास दोघांचा वाद विकोपाला गेला.
त्यानंतर विशालने संतप्त होऊन काजलच्या तोंडावर, नाकावर, दांड्याने आणि इतर धारदार वस्तूने मारहाण केली. या मारहाणीमध्ये काजल ही गंभीर जखमी झाली. दरम्यान ग्रामस्थांनी जखमी काजलला जामनेर उपजिल्हा रुग्णालयात आणले असता तेथे तिचा मृत्यू झाल्याचे वैद्यकीय अधिकाऱ्यांनी घोषित केले. यावेळी काजलच्या नातेवाईकांनी एकच आक्रोश केला.
जामनेर पोलीस स्टेशनला घटनेची माहिती मिळताच त्यांनी घटनास्थळी जाऊन माहिती घेतली. तसेच पती विशाल याला ताब्यात घेतले आहे. दरम्यान सोमवारी सकाळी उपजिल्हा रुग्णालयामध्ये काजलच्या माहेरच्या मंडळींनी सासरच्या मंडळींना आणि पती विशालला मारहाण करण्याचा प्रयत्न केला. पोलिसांनी वेळीच धाव घेऊन परिस्थिती नियंत्रणात आणली. दरम्यान खुनाच्या घटनेमुळे जामनेर तालुका पुन्हा एकदा हादरला आहे.
