जळगाव, दि.३० – जळगाव येथे अनुभूती निवासी स्कूलमध्ये सुरू असलेल्या ४८ व्या मुलांच्या व ३९ व्या मुलींच्या गटातील सब ज्युनिअर राष्ट्रीय अजिंक्यपद बुद्धिबळ स्पर्धेचा काल चौथा दिवस होता. चौथ्या दिवशी पाचवी फेरी खेळवण्यात आली. मुलांच्या गटातील पहिल्या पटावर आंध्राच्या इम्रानने अवघ्या १५ चालीतच हरयाणाच्या अर्शदीप वर विजय संपादन केला, दुसऱ्या पटावर पारस ने डाव अनिर्णीत अवस्थेकडे झुकवला. त्याच बरोबर तिसऱ्या पटावरील सामन्यात महाराष्ट्राच्या कुशाग्रने मयंक बरोबर डाव अनिर्णीत ठेवण्याची संधी देखील त्याला गमवावी लागली.
चौथ्या पटावर कर्नाटकच्या अक्षतने खेळलेल्या निमझोविच लार्सन हल्ल्यापुढे मृत्युंजयला शरणागती पत्करावी लागली. पाचव्या पटावर प.बंगालचा सम्यक व तेलंगणाच्या पवन ने ५९ चालिमध्ये बरोबरी मान्य केली तर, सहाव्या पटावर ३.५ गुणांसह खेळत असलेल्या दिल्लीच्या दक्ष गोयल ने सुरवातीपासूनच आक्रमक चाली रचल्याने अदक बिवोर ने हार मान्य केली. पाचव्या फेरी अखेर आंध्राचा फिडे मास्टर इम्रान ५ गुणांसह निर्विवादपणे आघाडीवर असून आसाम चा अग्रमानांकित मयंक, महाराष्ट्राचा पारस, दिल्लीचा दक्ष गोयल आणि कर्नाटकाचा अक्षत सुरेका साडे चार गुणांसह संयुक्तपणे द्वितीय स्थानावर आहेत.
मुलींच्या गटात, पहिल्या पटावर महाराष्ट्राच्या संनीद्धी भट ने आंध्र प्रदेशच्या आमुक्ता गुंतकाचा पराभव करत आपले वर्चस्व कायम राखले. दुसऱ्या पटावर उत्तर प्रदेशच्या शुभी गुप्ताने केरळच्या अनुपमा श्री कुमारचा स्लाव बचाव मोडून काढला. तर तिसऱ्या पटावर जागृती कुमारी ने अचूक चाल खेळत सामना खिशात घातला. चौथ्या पटावर उत्तराखंडच्या शेराली पटनाईक हीस अग्रमानांकित मृत्तिकाला हरवण्याच्या अनेक संधी प्राप्त झाल्या पण स्पर्धात्मक अनुभव कमी पडल्याने तिला बरोबरी स्वीकारावी लागली.
पाचव्या फेरिअखेर संनिद्धी भट ५ गुणांसह आघाडीवर असून साडेचार गुणांसह शुभीं गुप्ता, सपर्या घोष द्वितीय स्थानांवर आहेत, ४ गुणांसह अजून ५ खेळाडू संयुक्तरित्या तृतीय स्थानावर आहेत. दोन्ही गटातील पहिल्या १० डावांचे थेट प्रक्षेपण चालू असून प्रेक्षक तासनतास विविध चालिंचे विश्लेषण करण्यात गुंगून जात आहेत. स्पर्धेतील पाच फेऱ्या संपल्या असून अजून स्पर्धेतील ६ फेऱ्या शिल्लक आहेत.
▪️खेळभावना सर्वाच्चस्थानी – अभिजीत कुंटे..
भारतीय राष्ट्रीय चेस संघाचे मुख्य निवडकर्ता, ग्रँडमास्टर अभिजित कुंटे यांनी सहभागी खेळाडूंना महत्वपूर्ण मार्गदर्शन केले. त्यांनी सर्वांशी संवाद साधतांना म्हटले की, ‘मला आशा आहे की तुम्ही सर्व जैन इरिगेशन सिस्टीम लि. च्या आदरतीथ्याने नक्कीच आनंदी असाल, हे नयनरम्य आणि निसर्गरम्य वातावरण तुमची मानसिकता स्थिर ठेवण्यासाठी मदत करत असेलच. आपण नेहमी खेळभावना सर्वोच्च स्थानी कायम ठेवून स्पर्धा करत राहावे ज्यामुळे आपले व्यक्तिमत्वालाही त्याला लाभ होतो. आपल्या उत्तम खेळाचे प्रदर्शन करावे. यासह त्यांनी सर्व सहभागी स्पर्धकांना शुभेच्छा दिल्या.
▪️अशोक जैन यांच्याशी पालकांच्या दिलखुलास गप्पा..
जैन इरिगेशन सिस्टिम्सचे अध्यक्ष अशोक जैन यांच्याशी स्पर्धक खेळाडूंच्या पालकांनी दिलखुलास गप्पा मारल्या. यावेळी अनेकांनी त्यांच्या आयोजनाविषयी तोंडभरून कौतुक केले तर काहींनी त्यांना मिळत असलेल्या आदरातिथ्यासाठी अशोक जैन यांचे आभार व्यक्त केले. यासह काहींनी अश्या स्पर्धा कायम तुमच्याकडे आयोजित केल्या जाव्यात असा अट्टाहास केला. यावेळी हिमाचल प्रदेश येथील स्पर्धकाच्या पालकांनी हिमाचल मध्ये चेससाठी जैन इरिगेशनने पुढाकार घेऊन तेथेही प्रचार प्रसार करावा अशी अपेक्षा व्यक्त केली.
