जळगाव, प्रतिनिधी : गोदावरी फाउंडेशन संचालित गोदावरी इन्स्टिट्यूट ऑफ मॅनेजमेंट अँड रिसर्च (ॠखचठ), जळगाव येथील बीसीए, एमसीए आणि एमबीएच्या विद्यार्थ्यांसाठी गोदावरी इंडस्ट्रियल आणि टेक्नोडिया इंडस्ट्रीज, जळगाव येथे औद्योगिक भेटीचे आयोजन करण्यात आले. विद्यार्थ्यांना वर्गात आत्मसात केलेल्या सैद्धांतिक ज्ञानाचा प्रत्यक्ष उद्योगांमध्ये कसा उपयोग केला जातो, तसेच उत्पादन प्रक्रिया आणि औद्योगिक कामकाजाची पद्धत समजून घेता यावी, हा या भेटीमागील मुख्य उद्देश होता.
या औद्योगिक भेटीदरम्यान विद्यार्थ्यांनी इलेक्ट्रिकल एमसीबी निर्मिती, विविध घटकांचे उत्पादन व असेंब्ली, वेल्डिंग प्रक्रिया आणि पिव्होट पिन असेंब्ली यांची प्रत्यक्ष माहिती घेतली. तसेच थर्मल आणि मॅग्नेटिक लाईनवरील घटकांच्या निर्मिती प्रक्रियेची पाहणी केली. ईव्ही चार्जर्सचे उत्पादन तसेच चारचाकी वाहनांसाठी एसी टू डीसी चार्जर्स तयार करण्याच्या प्रक्रियेचीही विद्यार्थ्यांनी माहिती जाणून घेतली.
यावेळी उद्योगाचे प्लांट डायरेक्टर चेतन नारखेडे आणि प्लांट हेड प्रविण येवले यांनी विद्यार्थ्यांना विविध उत्पादन प्रक्रिया, तांत्रिक बाबी आणि औद्योगिक कामकाजाविषयी सविस्तर मार्गदर्शन केले. विद्यार्थ्यांनी विचारलेल्या प्रश्नांना उत्तरे देत त्यांच्या शंकांचे निरसनही करण्यात आले. या भेटीमुळे विद्यार्थ्यांना उद्योगांमधील आधुनिक तंत्रज्ञान, उत्पादन व्यवस्थापन आणि प्रत्यक्ष कामकाजाचा जवळून अनुभव घेता आला.
सैद्धांतिक ज्ञानासोबत व्यावहारिक कौशल्ये विकसित करण्यासाठी तसेच भविष्यातील करिअरच्या दृष्टीने औद्योगिक क्षेत्राची ओळख निर्माण करण्यासाठी ही भेट उपयुक्त ठरली.सदर औद्योगिक भेटीचे आयोजन इंडस्ट्रियल इंटरॅक्शन अँड व्हिजिट कमिटीच्या समन्वयक प्रा. रेणुका पोळ यांच्या मार्गदर्शनाखाली करण्यात आले. या उपक्रमामुळे विद्यार्थ्यांच्या तांत्रिक ज्ञानात आणि औद्योगिक क्षेत्राविषयीच्या समजुतीत मोलाची भर पडली.
