जळगाव, प्रतिनिधी : एमडी ड्रग्जची तस्करी करताना स्थानिक गुन्हे शाखेच्या पथकाने अटक केलेल्या सराईत गुन्हेगार अजय बिरजू गारुंगे (रा. तांबापुरा) याला एमडी ड्रग्जचा पुरवठा तांबापुरातील शेख अजमल शेख इस्माईल उर्फ अज्जू मालेगाव (वय ४५) याने केल्याचे पोलिसांच्या तपासात समोर आले आहे. अज्जू मालेगाव हा ड्रग्जच्या नेटवर्कमधील मुख्य पुरवठादार म्हणून काम करीत असल्याचा पोलिसांचा संशय असून, त्याचे जळगावसह धुळे, मालेगाव आणि बुलढाणा जिल्ह्यांपर्यंत नेटवर्क असल्याचे तपासातून पुढे आले आहे.
पाळधी-तरसोद बायपास महामार्गावरील कचरा फॅक्टरीजवळ १ ऑक्टोबर रोजी अजय गारुंगे हा एमडी ड्रग्ज विक्रीसाठी घेऊन आला असताना स्थानिक गुन्हे शाखेच्या पथकाने त्याला अटक केली होती. त्याच्याकडून ६४.४४ ग्रॅम एमडी ड्रग्ज जप्त करण्यात आले असून, त्याची किंमत सुमारे १ लाख ९३ हजार रुपये आहे. न्यायालयाने त्याला चार दिवसांची पोलिस कोठडी सुनावली असून, या कालावधीत स्थानिक गुन्हे शाखेकडून त्याची कसून चौकशी सुरू आहे.
चौकशीदरम्यान अजय गारुंगे याने त्याच्याकडून जप्त करण्यात आलेले एमडी ड्रग्ज हे तांबापुरा परिसरातील त्याच्या ओळखीच्या शेख अजमल शेख इस्माईल उर्फ अज्जू मालेगाव याच्याकडून घेतल्याचे पोलिसांना सांगितले. त्यानंतर पोलिसांनी अज्जू मालेगावचा शोध सुरू केला आहे. अज्जूने अजय गारुंगेसह फरार असलेल्या सोनू गणेश कुंभार (वय २५, रा. तांबापुरा) यालाही एमडीचा पुरवठा केल्याचे तपासात समोर आले आहे.
पोलिसांच्या माहितीनुसार, अज्जू मालेगाव मुंबईहून मोठ्या प्रमाणात, किलोच्या प्रमाणात एमडी ड्रग्ज आणत असल्याचा संशय आहे. त्यानंतर जळगावसह धुळे, मालेगाव आणि बुलढाणा परिसरातील पेडलरांना मोठ्या प्रमाणात ड्रग्जचा पुरवठा केला जात असल्याचे तपासात निष्पन्न झाले आहे. मोठ्या प्रमाणातील साठ्यातून पेडलरांना व्यावसायिक प्रमाणात ड्रग्ज पुरविले जात होते आणि संबंधित पेडलर मागणीनुसार त्याची पुढे विक्री करीत असल्याचे पोलिसांच्या कारवाईतून समोर आले आहे.
गेल्या काही महिन्यांत पोलिसांनी एमडी ड्रग्जच्या प्रकरणांत अनेक पेडलरांना अटक केली आहे. त्यामुळे अज्जू मालेगावच्या माध्यमातून आणखी किती लहान-मोठ्या पेडलरांना ड्रग्जचा पुरवठा केला जात होता, याचा तपास पोलिसांकडून सुरू आहे. एकाचवेळी अनेक पेडलरांना मोठ्या प्रमाणात ड्रग्जचा पुरवठा होत असल्याने अज्जू मालेगाव हा या ड्रग्ज नेटवर्कमधील प्रमुख पुरवठादार असल्याचा पोलिसांचा संशय आहे.
अजय गारुंगे आणि शेख अजमल उर्फ अज्जू मालेगाव यांची काही वर्षांपूर्वी एका जिममध्ये ओळख झाली होती. त्यानंतर दोघे एकमेकांच्या संपर्कात आले. या ओळखीतूनच पुढे एमडी ड्रग्जच्या तस्करीचे नेटवर्क उभे राहिल्याचे पोलिसांच्या तपासात समोर आले आहे. दोघांचे नेटवर्क जळगावसह आजूबाजूच्या जिल्ह्यांमध्ये पसरले असल्याने पोलिस या संपूर्ण साखळीचा शोध घेत आहेत.
दरम्यान, शेख अजमल उर्फ अज्जू मालेगाव याच्यावर यापूर्वीही अनेक गुन्हे दाखल असल्याची माहिती पोलिसांनी दिली आहे. गेल्या सुमारे २० वर्षांपासून तो गांजाच्या तस्करीत सक्रिय असल्याचेही तपासात समोर आले आहे. एमडी ड्रग्जच्या प्रकरणातही त्याचा सहभाग असल्याचे पुढे आल्याने जळगाव पोलिसांसह धुळे आणि मालेगाव पोलिसांचेही त्याच्या हालचालींकडे लक्ष आहे.
अज्जू मालेगाव आणि सोनू कुंभार या दोघांच्या शोधासाठी पोलिसांनी दोन स्वतंत्र पथके रवाना केली आहेत. त्यांच्या अटकेनंतर ड्रग्जच्या पुरवठ्याची साखळी, त्यांच्याशी संपर्कात असलेले पेडलर तसेच जळगाव आणि इतर जिल्ह्यांमध्ये कार्यरत असलेल्या नेटवर्कबाबत आणखी महत्त्वाची माहिती समोर येण्याची शक्यता आहे.
