सिंधुदुर्ग, (विशेष प्रतिनिधी) : येथील महावितरणच्या स्मार्ट मीटरमध्ये ‘कॅमेरा’ असल्याचा खोटा आणि दिशाभूल करणारा आरोप करून सोशल मीडियावर सनसनाटी पसरवल्याप्रकरणी सावंतवाडी (जि. सिंधुदुर्ग) पोलीस ठाण्यात ‘कोकणसाद’ यूट्यूब न्यूज चॅनेलचे संपादक सागर चव्हाण आणि ग्राहक प्रतिनिधी नंदन वेंगुर्लेकर यांच्याविरुद्ध रविवारी फौजदारी गुन्हे दाखल करण्यात आले.
एका चर्चासत्रादरम्यान स्मार्ट मीटरमुळे नागरिकांच्या खाजगी आयुष्यावर पाळत ठेवली जात असल्याचा हास्यास्पद व कपोलकल्पित दावा नंदन वेंगुर्लेकर यांनी केला होता. यावर महावितरणच्या अधिकाऱ्यांनी तात्काळ स्पष्टीकरण देऊनही, यूट्यूब संपादक सागर चव्हाण याने महावितरणचा खुलासा वगळून केवळ दिशाभूल करणारा २ ते ३ मिनिटांचा भाग सोशल मीडियावर प्रसारित केला.
नागरिकांमध्ये भीतीचे वातावरण निर्माण करणे, गुन्ह्यास चिथावणी देणे, बदनामी करणे आणि शांततेचा भंग करणे याप्रकरणी भारतीय न्याय संहितेनुसार कलम ३५३ (१) (बी), ३५१ (३), ३५२ व ३५६ अन्वये हे गुन्हे दाखल करण्यात आले आहेत.
दरम्यान, “स्मार्ट मीटर हे पूर्णपणे सुरक्षित आणि अत्याधुनिक तंत्रज्ञानावर आधारित असून त्यात कोणताही कॅमेरा किंवा गोपनीयतेचा भंग करणारी यंत्रणा नाही; त्यामुळे ग्राहकांनी कोणत्याही खोट्या व अफवांवर विश्वास ठेवू नये,” असे आवाहन महावितरणतर्फे करण्यात आले आहे.
