चाळीसगाव, (प्रतिनिधी) : महाराष्ट्र शासनाने प्रतिबंधित केलेल्या गुटखा आणि सुगंधित तंबाखूच्या अवैध तस्करीविरोधात चाळीसगाव शहर पोलिसांनी धडक कारवाई केली आहे. या कारवाईत पोलिसांनी एकूण ५ आरोपींना रंगेहात पकडून त्यांच्याकडून गुटखा, सुगंधित पानमसाला आणि वाहतुकीसाठी वापरलेली कार असा एकूण ६ लाख ५७ हजार रुपयांचा मुद्देमाल जप्त केला आहे.
जळगाव जिल्ह्याचे पोलीस अधीक्षक श्रीकांत धिवरे यांच्या आदेशानुसार अवैध धंद्यांचे समूळ उच्चाटन करण्यासाठी राबवलेल्या मोहिमेचा हा एक भाग आहे. चाळीसगाव शहर पोलीस स्टेशनचे प्रभारी अधिकारी अमितकुमार मनेल हे अवैध धंद्यांची गोपनीय माहिती संकलित करत असताना, त्यांना ८ जुलै २०२६ रोजी खात्रीशीर माहिती मिळाली.
चाळीसगाव शहरातील हनुमानवाडी परिसर, बलभीम व्यायामशाळेजवळ, आनंदवाडी येथील जुन्या डिझेल गॅरेजसमोर आणि बसस्थानकाच्या मागील लक्ष्मीनगर परिसरात काही जण प्रतिबंधित गुटख्याची अवैध विक्री व वाहतूक करत आहेत. या माहितीच्या आधारे प्रभारी अधिकाऱ्यांनी आपल्या पथकासह अत्यंत गोपनीय पद्धतीने सापळा रचून पाच आरोपींना ताब्यात घेतले. यात अजित चांदूमल रावलानी, कुबेर शेख कसम, हितेश किशोर पवार, निखिल राजेंद्र केसरवाणी आणि सौरभ संजय शिंगणे (सर्व रा. चाळीसगाव) यांचा समावेश आहे.
आरोपींच्या ताब्यातील ट्रॅव्हल बॅगची तपासणी केली असता, त्यात मोठ्या प्रमाणावर प्रतिबंधित गुटखा आणि सुगंधित तंबाखू आढळून आला. पोलिसांनी तातडीने अन्न व औषध प्रशासन विभागाच्या अधिकाऱ्यांना घटनास्थळी पाचारण करून पंचनामा केला. अन्न प्रशासन अधिकाऱ्यांच्या फिर्यादीवरून चाळीसगाव शहर पोलीस स्टेशनमध्ये गुन्हा दाखल करण्यात आला आहे. या कारवाईत गुटख्यासह वाहतुकीसाठी वापरलेली चारचाकी वाहन जप्त करण्यात आले आहे.
प्राथमिक तपासात हा प्रतिबंधित माल मध्यप्रदेशातील बऱ्हाणपूर येथून तस्करी करून चाळीसगाव येथे आणल्याचे उघड झाले असून, पोलीस या रॅकेटमधील इतर संबंधितांचा शोध घेत आहेत. ही उत्कृष्ट कामगिरी पोलीस अधीक्षक श्रीकांत धिवरे, अप्पर पोलीस अधीक्षक अशोक नखाते, उपविभागीय पोलीस अधिकारी विजयकुमार ठाकूरवाड यांच्या मार्गदर्शनाखाली पोलीस निरीक्षक अमितकुमार मनेळ, पोलीस उपनिरीक्षक संदीप घुले, पो.कॉ. मोहन सूर्यवंशी, अशोक मोरे, कल्पेश पगारे यांच्या पथकाने केली.
दरम्यान, नागरिकांनी अशा कोणत्याही अवैध व्यवसायाची माहिती मिळाल्यास तातडीने पोलिसांशी संपर्क साधावा, माहिती देणाऱ्याचे नाव गोपनीय ठेवले जाईल, असे आवाहन पोलीस अधीक्षक श्रीकांत धिवरे यांनी केले आहे.
