पारोळा, (प्रतिनिधी) : तालुक्यातील पिंपळखेड येथील मारोती मंदिरातून मूर्तीचा चांदीचा मुकुट आणि कानातील चांदीची मासळी चोरणाऱ्या संशयित आरोपीला पारोळा पोलिसांनी अवघ्या ४८ तासांत शिताफीने ताब्यात घेतले आहे. आरोपीकडून ६५ हजार रुपये किमतीचा मुद्देमाल हस्तगत करण्यात आला असून, त्याला अटक करण्यात आली आहे.
याबाबत सविस्तर वृत्त असे की, दिनांक ८ जून २०२६ रोजी रात्री साडेनऊ वाजेच्या सुमारास पिंपळखेड मारोती मंदिर उत्रड शिवार (ता. पारोळा) येथे एका अनोळखी इसमाने दर्शनाच्या बहाण्याने प्रवेश केला. काही वेळ मंदिरात थांबून तो निघून गेला. त्यानंतर मंदिराचे पुजारी आसाराम त्र्यंबक पाटील (रा. बहादरपूर, ता. पारोळा) हे मंदिर बंद करून झोपायला गेले. दुसऱ्या दिवशी, ९ जून रोजी सकाळी साडेपाच वाजेच्या सुमारास पुजारी हे मंदिराची साफसफाई करत असताना, त्यांना मारोती मूर्तीवरील ५०० ग्रॅम वजनाचा चांदीचा मुकुट (किंमत रु. ५०,०००/-) आणि कानातील १५० ग्रॅम वजनाची चांदीची मासळी (किंमत रु. १५,०००/-) गायब असल्याचे दिसून आले.
मंदिरात चोरी झाल्याचे लक्षात येताच पुजारी आसाराम पाटील यांनी पारोळा पोलीस स्टेशन गाठून फिर्याद दिली. त्यांच्या फिर्यादीवरून पारोळा पोलीस ठाण्यात गुन्हा दाखल करण्यात आला होता. गुन्ह्याचे गांभीर्य ओळखून सहाय्यक पोलीस निरीक्षक योगेश महाजन यांनी तपासाची चक्रे गतिमान केली. तपासादरम्यान पोलिसांनी मंदिरातील व परिसरातील सीटीटीव्ही फुटेज प्राप्त केले. गुप्त माहिती आणि सीसीटीव्ही फुटेजच्या आधारे पोलिसांनी हिरापूर (ता. पारोळा) येथील संशयित हिरालाल अरुण पाटील याला ताब्यात घेतले.
पोलिसांनी संशयित हिरालाल पाटील याला विश्वासात घेऊन सखोल चौकशी केली असता, त्याने ८ जूनच्या रात्री पिंपळखेड मारोती मंदिरात चोरी केल्याची कबुली दिली. पोलिसांनी आरोपीच्या हिरापूर येथील घरातून चोरीला गेलेला ६५ हजार रुपयांचा संपूर्ण मुद्देमाल हस्तगत केला असून आरोपीला अटक केली आहे. या गुन्ह्याचा पुढील तपास पोलीस हेडकॉन्स्टेबल कैलास साळुंखे करत आहेत.
सदरची यशस्वी कामगिरी जळगाव जिल्हा पोलीस अधीक्षक श्रीकांत धिवरे, अप्पर पोलीस अधीक्षक अशोक नखाते, अमळनेर भागाचे एसडीपीओ विनायक कोते यांच्या मार्गदर्शनाखाली पारोळा पोलीस स्टेशनचे सपोनि योगेश महाजन, पोहेकॉ कैलास साळुंखे, संदिप अशोक सातपुते, पोकॉ अजय बाविस्कर, आकाश माळी, सुनिल पाटील, अभिजीत पाटील, गिरिश सोनवणे आणि अनिल राठोड यांच्या पथकाने केली आहे. पोलिसांच्या या जलद कारवाईमुळे परिसरात कौतुक होत आहे.
