भुसावळ, (प्रतिनिधी) : येथील नेवे-वाणी समाज मंडळाच्या वतीने रविवार, दिनांक १४ जून २०२६ रोजी भव्य ‘बॉक्स क्रिकेट स्पर्धा-२०२६’ चे आयोजन करण्यात आले आहे. यावल रोडवरील पोदार इंटरनॅशनल स्कूलच्या मैदानावर सकाळी ६:०० वाजेपासून या क्रीडा महोत्सवाला सुरुवात होणार असून, यात एकूण ३१ सामने खेळवले जाणार आहेत.
समाजातील युवा खेळाडूंच्या सुप्त गुणांना वाव मिळावा, त्यांना क्रीडा क्षेत्रात प्रोत्साहन मिळावे आणि सर्व समाजबांधवांमध्ये आपुलकी व एकतेची भावना निर्माण व्हावी, या उद्देशाने या भव्य स्पर्धेचे आयोजन करण्यात आले आहे. रविवार, दि. १४ जून रोजी सकाळी ठीक ६:०० वाजता विविध क्षेत्रातील मान्यवरांच्या हस्ते या स्पर्धेचे शानदार उद्घाटन होईल. संपूर्ण दिवसभर क्रिकेटचा रोमांचक थरार अनुभवायला मिळणार असून, रात्री ८:०० वाजता बक्षीस वितरण समारंभाने या स्पर्धेचा समारोप केला जाईल.
विविध राज्यांतून संघांची नोंदणी..
या स्पर्धेला महाराष्ट्र तसेच राज्याबाहेरून देखील मोठा प्रतिसाद मिळाला आहे. स्पर्धेत एकूण १६ शहरांतील संघ सहभागी होत असून, यामध्ये महाराष्ट्रातील भुसावळ, जळगाव, साकळी, यवतमाळ, पुणे, रिंगणगाव, चुंचाळे, यावल आणि मुंबई या शहरांचा समावेश आहे. तसेच इतर राज्यांतून बऱ्हाणपूर (मध्य प्रदेश) आणि सुरत (गुजरात) येथील मातब्बर संघही आपले नशीब आजमावण्यासाठी दाखल झाले आहेत.
सहकुटुंब उपस्थित राहण्याचे आवाहन..
“या क्रीडा महोत्सवाच्या निमित्ताने संपूर्ण समाज एका छताखाली येत आहे. हा केवळ खेळ नसून समाजबांधवांना एकत्र आणणारा सोहळा आहे. तरी भुसावळ व परिसरातील सर्व समाजबांधवांनी सहकुटुंब, सहपरिवार दिवसभर उपस्थित राहून खेळाडूंचा उत्साह वाढवावा,” असे आवाहन मंडळाचे अध्यक्ष किशोर नेवे, उपाध्यक्ष दिपक नेवे, सचिव राम माहूरकर, महिला मंडळाच्या अध्यक्षा विनीता सुनिल नेवे, उपाध्यक्षा अंजली प्रशांत नेवे, सचिव पुजा उदय नेवे व समस्त नेवे-वाणी समाज मंडळ, भुसावळ यांच्या वतीने करण्यात आले आहे.
