जळगाव, (प्रतिनिधी) : ग्रामीण भागातील सर्वसामान्य जनतेपर्यंत शासकीय योजनांचा थेट लाभ पोहचविण्याच्या उद्देशाने तालुक्यातील भोकर येथे एक स्तुत्य उपक्रम राबविण्यात आला. राष्ट्रवादी युवती काँग्रेस आणि शिवशक्ती युवा फाउंडेशन यांच्या संयुक्त विद्यमाने आयोजित ‘योजना कल्याणकारी सर्वसामान्यांच्या दारी’ या अभियानांतर्गत गावातील ७५ लाभार्थ्यांना आरोग्य तपासणीसह गृहपयोगी वस्तूंचे वाटप करण्यात आले.
माजी मंत्री अनिल पाटील व जिल्हाध्यक्ष संजय पवार यांच्या मार्गदर्शनाखाली राष्ट्रवादी युवती काँग्रेसच्या जिल्हाध्यक्षा तथा शिवशक्ती युवा फाउंडेशनच्या अध्यक्षा इंजि. मोनालिका पवार यांच्या वतीने या विशेष कार्यक्रमाचे आयोजन करण्यात आले होते. याप्रसंगी मान्यवर अतिथी सुधाकर पवार यांच्या हस्ते भोकर गावातील ७५ लाभार्थ्यांना गृहपयोगी संच, कामगार कार्ड आणि सेफ्टी किटचे यशस्वी वितरण करण्यात आले.
गृहपयोगी वस्तूंच्या वाटपासोबतच उपस्थित ग्रामस्थांची मोफत आरोग्य तपासणी करून त्यांना वैद्यकीय सल्लाही देण्यात आला. कार्यक्रमादरम्यान इंजि. मोनालिका पवार यांनी उपस्थितांशी संवाद साधत विविध कल्याणकारी शासकीय योजनांची सविस्तर माहिती दिली आणि ग्रामीण भागातील पात्र नागरिकांनी या योजनांचा लाभ घेण्याचे आवाहन केले.
या लोकोपयोगी उपक्रमाला यशस्वी करण्यासाठी सुधाकर पवार, किशोर पवार, प्रा. भाऊसाहेब सोनवणे, अशोक पाटील, प्रभाकर कोळी, लोटन सोनवणे, सुकदेव बाविस्कर, राज पवार, ललित बाविस्कर, योगेश कोळी, जयश्री पवार तसेच भोकरच्या पोलीस पाटील हेमलता पवार यांचे अनमोल सहकार्य लाभले. या कार्यक्रमाला गावातील नागरिकांची आणि महिलांची मोठ्या संख्येने उपस्थिती होती. शिवशक्ती फाउंडेशन आणि राष्ट्रवादी युवती काँग्रेसच्या या सामाजिक बांधिलकीचे संपूर्ण परिसरात कौतुक होत आहे.
