जळगाव, (प्रतिनिधी) : गेल्या काही दिवसांपासून राजकीय वर्तुळात उत्सुकता वाढवणाऱ्या जळगाव विधान परिषद निवडणुकीचा सस्पेन्स अखेर संपला आहे. या जागेसाठी भारतीय जनता पक्षाकडून रावेर तालुक्यातील जिल्हा परिषदेचे माजी उपाध्यक्ष नंदकिशोर महाजन यांच्या नावाची अधिकृत घोषणा करण्यात आली आहे. रविवारी रात्री उशिरा भाजपचे राष्ट्रीय महासचिव अरुण सिंह यांनी नंदकिशोर महाजन यांच्यासह राज्यातील एकूण ११ उमेदवारांची अधिकृत यादी जाहीर केली.
जळगावच्या या जागेसाठी महायुतीमधील भाजप आणि मुख्यमंत्री एकनाथ शिंदे यांच्या शिवसेना पक्षात मोठी रस्सीखेच सुरू होती. दोन्ही बाजूंकडून जोरदार मोर्चेबांधणी केली जात असल्याने ही जागा कोणाच्या पदरात पडणार, याबाबत मोठी उत्सुकता निर्माण झाली होती. मात्र, सर्व चर्चांना पूर्णविराम देत अखेर ही जागा भाजपने आपल्याकडेच राखण्यात यश मिळवले आहे.
उमेदवारी मिळालेले नंदकिशोर महाजन हे राज्याचे जलसंपदामंत्री गिरीश महाजन यांचे अत्यंत निकटवर्ती आणि विश्वासू मानले जातात, त्यामुळे त्यांच्या उमेदवारीला विशेष राजकीय महत्त्व प्राप्त झाले आहे. पक्षश्रेष्ठींनी दाखवलेला विश्वास सार्थ ठरवण्यासाठी नंदकिशोर महाजन आज, सोमवारी आपल्या समर्थकांसह अधिकृत उमेदवारी अर्ज दाखल करणार आहेत.
भाजपच्या ११ उमेदवारांची संपूर्ण यादी:
जळगाव: नंदकिशोर महाजन
नागपूर: डॉ. राजीव पोतदार
वर्धा-चंद्रपूर-गडचिरोली: अरुण लखाणी
भंडारा-गोंदिया: अविनाश ब्राह्मणकर
अमरावती: प्रवीण पोटे-पाटील
सांगली-सातारा: धैर्यशील कदम
सोलापूर: राजेंद्र राऊत
अहिल्यानगर: प्राजक्त तनपुरे
छत्रपती संभाजीनगर-जालना: सुहास शिरसाट
नांदेड: अमर राजूरकर
धाराशिव-लातूर-बीड: बसवराज पाटील
नंदकिशोर महाजन यांच्या उमेदवारीमुळे जळगाव जिल्ह्यातील भाजप कार्यकर्त्यांमध्ये उत्साहाचे वातावरण असून, आता या निवडणुकीतील पुढील घडामोडींकडे संपूर्ण जिल्ह्याचे लक्ष लागले आहे.
