जळगाव, (प्रतिनिधी) : डॉ. वर्षा पाटील वुमेन्स कॉलेज ऑफ होम सायन्समध्ये ‘जागतिक पुस्तक दिन’ मोठ्या उत्साहात साजरा करण्यात आला. विद्यार्थिनींमध्ये वाचनाची आवड निर्माण व्हावी आणि ग्रंथांचे महत्त्व अधोरेखित व्हावे, या उद्देशाने या विशेष कार्यक्रमाचे आयोजन करण्यात आले होते.
कार्यक्रमाचा प्रारंभ महाविद्यालयाच्या प्राचार्या कविता शितल कुमार देशमुख यांच्या हस्ते झाला. त्यांनी ग्रंथालय शास्त्राचे जनक डॉ. एस. आर. रंगनाथन यांच्या प्रतिमेला पुष्पहार अर्पण करून अभिवादन केले. यावेळी बोलताना प्राचार्यांनी जीवनात पुस्तकांचे स्थान गुरूस्थानी असल्याचे सांगत वाचन संस्कृती जोपासण्याचे आवाहन केले.
महाविद्यालयाच्या ग्रंथपाल कविता राहुल भोरटके यांनी जागतिक पुस्तक दिनाचे औचित्य साधून विद्यार्थिनींना सखोल माहिती दिली. बदलत्या काळात पुस्तके हीच खरी सोबती असून, वैचारिक प्रगल्भतेसाठी वाचन किती आवश्यक आहे, हे त्यांनी विविध उदाहरणांतून पटवून दिले.
शैक्षणिक वर्षात ग्रंथालयाचा सर्वाधिक वापर करून जास्तीत जास्त पुस्तकांचे वाचन केल्याबद्दल तृतीय वर्ष बी.एस्सी.ची विद्यार्थिनी दिशा जैन हिला पेन आणि पुस्तक देऊन मान्यवरांच्या हस्ते गौरविण्यात आले.
हा कार्यक्रम यशस्वी करण्यासाठी ॲडमिनिस्ट्रेटिव्ह ऑफिसर मीनल राणे, एन.एस.एस. को-ऑर्डिनेटर प्रो. जयश्री कुलकर्णी, प्रो. हिमानी जमाले यांच्यासह सर्व शिक्षक आणि शिक्षकेतर कर्मचारी वृंदाने मोलाचे सहकार्य केले. कार्यक्रमाला विद्यार्थिनींचा मोठा प्रतिसाद लाभला.
