जळगाव, (प्रतिनिधी) : येथील डॉ. उल्हास पाटील वैद्यकीय महाविद्यालयात सध्या ‘समन्वय २०२६’ या सांस्कृतिक सप्ताहाची मोठी धूम पाहायला मिळत आहे. या महोत्सवांतर्गत आयोजित करण्यात आलेल्या ‘टीचर्स ज्युनिअर नाईट’मध्ये डॉक्टरांच्या कलाविष्काराने सर्वांची मने जिंकली. विशेषतः माजी खासदार डॉ. उल्हास पाटील आणि सचिव डॉ. वर्षा पाटील यांनी सादर केलेल्या ‘ना कजरे की धार, ना मोतियों के हार’ या अजरामर गीताने उपस्थित श्रोत्यांना मंत्रमुग्ध केले.
सांस्कृतिक सप्ताहाचा थाटात प्रारंभ..
डॉ. उल्हास पाटील वैद्यकीय महाविद्यालयाच्या एमबीबीएस अभ्यासक्रमाच्या ‘आग्नेय’ बॅचतर्फे १२ ते १८ एप्रिल या कालावधीत ‘समन्वय २०२६’ चे आयोजन करण्यात आले होते. या कार्यक्रमाचे औपचारिक उद्घाटन डॉ. उल्हास पाटील यांच्या हस्ते दीपप्रज्वलनाने झाले. यावेळी महाविद्यालयाच्या सचिव डॉ. वर्षा पाटील, सदस्य डॉ. वैभव पाटील, वैद्यकीय संचालक डॉ. एन. एस. आर्विकर, अधिष्ठाता डॉ. प्रशांत सोळंके, वैद्यकीय अधीक्षक डॉ. प्रेमचंद पंडित, डॉ. सी. कांते, डॉ. गुणवंतराव सरोदे आणि आयुर्वेद महाविद्यालयाचे अधिष्ठाता डॉ. हर्षल बोरोले यांची प्रमुख उपस्थिती होती.
डॉक्टरांच्या सुरांनी रंगली रात्र..
दैनंदिन वैद्यकीय सेवेच्या धावपळीतून वेळ काढत डॉक्टरांनी आपल्यातील कलाकार या व्यासपीठावर सादर केला. डॉ. उल्हास पाटील आणि डॉ. वर्षा पाटील यांनी आपल्या सुमधुर आवाजात सादर केलेल्या गीतांनी कार्यक्रमाची रंगत द्विगुणित केली. त्यांच्या या सादरीकरणाला विद्यार्थी आणि कर्मचारी वर्गाने टाळ्यांच्या कडकडाटात दाद दिली.
विद्यार्थ्यांचा विविध कलाविष्कार..
यावेळी केवळ शिक्षकच नव्हे तर विद्यार्थ्यांनीही नृत्य, गायन आणि अभिनयाचे सादरीकरण करत आपल्या सुप्त गुणांचे दर्शन घडवले. गुरु-शिष्यांच्या या अनोख्या ‘टीचर्स ज्युनिअर नाईट’मुळे महाविद्यालयाचे वातावरण उत्साही आणि चैतन्यमय झाले होते. सप्ताहात विविध क्रीडा आणि सांस्कृतिक स्पर्धांचे आयोजन करण्यात आले असून, ‘आग्नेय’ बॅचचे विद्यार्थी हा सोहळा यशस्वी करण्यासाठी विशेष परिश्रम घेत आहेत.
