जळगाव, (प्रतिनिधी) : शहरात गावठी कट्टा आणि धारदार कोयत्यासारखी घातक शस्त्रे बाळगून दहशत माजवण्याच्या उद्देशाने फिरणाऱ्या दोन सराईत गुन्हेगारांना एम.आय.डी.सी. पोलिसांनी सिनेस्टाईलने पाठलाग करून अटक केली आहे. त्यांच्याकडून एक गावठी बनावटीचा कट्टा, रिकामी मॅगझीन आणि मोटारसायकलसह एकूण ७०,५०० रुपयांचा मुद्देमाल जप्त करण्यात आला आहे.
जळगाव शहरातील कासमवाडी परिसरात दोन तरुण घातक शस्त्रांसह फिरत असल्याची गोपनीय माहिती एम.आय.डी.सी. पोलीस स्टेशनचे पोलीस निरीक्षक बबन आव्हाड यांना मिळाली होती. या माहितीच्या आधारे गुन्हे शोध पथकाने तात्काळ कासमवाडी, नेरी नाका आणि स्मशानभूमी परिसरात सापळा रचला. नेरी नाका रोडवरील एकता चौक परिसरातील मोकळ्या मैदानात एक विनाक्रमांक मोटारसायकल पोलिसांना येताना दिसली. पोलिसांनी त्यांना थांबण्याचा इशारा केला असता, आरोपींनी वाहन न थांबवता पळून जाण्याचा प्रयत्न केला. मात्र, पोलिसांनी शिताफीने त्यांचा पाठलाग करून त्यांना ताब्यात घेतले.
संशयितांची अंगझडती घेतली असता, एकाच्या कमरेला गावठी बनावटीचा कट्टा आणि दुसऱ्याकडे लोखंडी धारदार कोयता व कट्ट्याची रिकामी मॅगझीन मिळून आली. पोलिसांनी अधिक विचारपूस केली असता त्यांनी आपली नावे रोहित गोपाळ कुंवर (वय २२, रा. कासमवाडी) आणि सागर रामा सोनवणे (वय २१, रा. मेस्का माता नगर) अशी सांगितली.
या कारवाईत पोलिसांनी २० हजार रुपये किमतीचा गावठी कट्टा, ५० हजार रुपयांची बजाज पल्सर मोटारसायकल, धारदार कोयता आणि मॅगझीन असा एकूण ७०,५०० रुपयांचा मुद्देमाल हस्तगत केला आहे. आरोपींविरुद्ध भारतीय शस्त्र अधिनियम आणि मोटर वाहन कायद्यान्वये गुन्हा दाखल करण्यात आला असून, न्यायालयाने त्यांना एक दिवसाची पोलीस कोठडी सुनावली आहे. ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक संदीप गावीत, उपविभागीय पोलीस अधिकारी नितीन गणापुरे यांच्या मार्गदर्शनाखाली पोलीस निरीक्षक बबन आव्हाड, राहुल तायडे, चंद्रकांत धनके, प्रमोद लाडवंजारी, गिरीश पाटील, किरण चौधरी, रमाकांत साळुंखे आणि शशिकांत मराठे यांच्या पथकाने केली.
