जळगाव, (प्रतिनिधी) : शहरात गुन्हेगारी कारवायांना पायबंद घालण्यासाठी पोलीस प्रशासन सतर्क असतानाच, एमआयडीसी पोलिसांनी धाडसी कारवाई करत एका गावठी कट्ट्यासह तीन जिवंत काडतुसे जप्त केली आहेत. याप्रकरणी सिल्लोड (जि. छत्रपती संभाजीनगर) येथील दोन तरुणांना अटक करण्यात आली असून, त्यांच्याकडून १ लाख ३३ हजार रुपयांचा मुद्देमाल हस्तगत करण्यात आला आहे.
कुसुंबा-एअरपोर्ट रस्त्यावर एक तरुण गावठी कट्टा घेऊन फिरत असल्याची गोपनीय माहिती एमआयडीसी पोलीस स्टेशनचे पोलीस निरीक्षक बबन आव्हाड यांना मिळाली होती. माहिती मिळताच त्यांनी तात्काळ गुन्हे शोध पथकाला कारवाईचे आदेश दिले.
पोलीस पथकाने २८ मार्च २०२६ रोजी एअरपोर्टजवळील ‘तारा बिझनेस पार्क’ परिसरात सापळा रचला. यावेळी एका दुचाकीवर दोन संशयित तरुण येताना दिसले. पोलिसांनी त्यांना थांबवण्याचा इशारा केला असता, त्यांनी पळून जाण्याचा प्रयत्न केला. मात्र, पथकाने शिताफीने पाठलाग करून त्यांना ताब्यात घेतले. झडती घेतली असता, दुचाकी चालकाच्या कमरेला एक गावठी कट्टा आणि खिशात तीन जिवंत काडतुसे मिळून आली.
दरम्यान संशयित दिपक ठकुबा गुंजाळ (वय २८) आणि विठ्ठल रंगनाथ सोनवणे (वय २५) दोघं रा. दुर्गा नगर, सिल्लोड यांना अटक करण्यात आली आहे. या कारवाईत गावठी बनावटीचे पिस्तूल (किंमत २०,००० रुपये), ०३ जिवंत काडतुसे (किंमत ३,००० रुपये), स्पोर्ट्स बाईक (किंमत १,००,००० रुपये), अँड्रॉइड मोबाईल फोन (किंमत १०,००० रुपये) असा एकूण १,३३,००० रुपये किमतीचा मुद्देमाल पोलिसांनी हस्तगत केला आहे.
आरोपींची अधिक चौकशी केली असता, त्यांनी हा कट्टा जळगावमधील तांबापुरा भागातील अजय बिरजु गारुंगे याच्याकडून घेतल्याची कबुली दिली. अजय गारुंगे सध्या फरार असून पोलीस त्याचा शोध घेत आहेत.
ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे व केदार बारबोले यांच्या मार्गदर्शनाखाली पोलीस निरीक्षक बबन आव्हाड, पोउनि राहुल तायडे, पोउनि चंद्रकांत धनके, किरण चौधरी, प्रमोद लाडवंजारी, गिरीश पाटील, विशाल कोळी आणि नितीन ठाकूर यांच्या पथकाने केली. या प्रकरणाचा पुढील तपास पोउनि चंद्रकांत धनके व पोकों चेतन पाटील करत आहेत.
