जळगाव, (प्रतिनिधी) : क्रिकेटप्रेमी जळगावकरांसाठी एक मोठी खुशखबर समोर आली आहे. इंडियन प्रीमियर लीगच्या (IPL) धर्तीवर जळगाव जिल्हा क्रिकेट असोसिएशनतर्फे ‘आर. सी. बाफना जळगाव क्रिकेट लीग (JCL) २०२६ – पर्व २’ चे भव्य आयोजन करण्यात आले आहे. जळगावसह संपूर्ण खान्देशातील उदयोन्मुख क्रिकेटपटूंना आपली प्रतिभा सिद्ध करण्यासाठी हे हक्काचे व्यासपीठ मिळणार असून, या स्पर्धेची अधिकृत घोषणा संघटनेचे अध्यक्ष तथा जैन इरिगेशनचे सहव्यवस्थापकीय संचालक अतुल जैन यांनी केली.
यावेळी व्यासपीठावर उपाध्यक्ष युसूफ मकरा, सचिव अरविंद देशपांडे, खजिनदार राजेंद्र लढ्ढा आणि ॲड. सुरज जहागीर यांची प्रमुख उपस्थिती होती.
मेहरुण परिसरातील कांताई नगर येथील ‘जैन ड्रीम स्पेसेस’ च्या अद्ययावत क्रीडांगणावर ही स्पर्धा पार पडणार आहे. आयपीएलच्या धर्तीवरील नियमावली असून पांढरा लेदर बॉल, खेळाडूंचे रंगीत गणवेश आणि दूधिया प्रकाशातील (डे-नाईट) सामने हे या स्पर्धेचे मुख्य आकर्षण असणार आहे. “Own The Game, Lead The League, Build Legacy” या घोषवाक्याखाली होणारी ही लीग जळगावच्या क्रीडा संस्कृतीला एका नव्या उंचीवर नेऊन ठेवणार आहे.
स्पर्धेबाबत अधिक माहिती देताना अतुल जैन म्हणाले की, “जळगाव आणि खान्देशातील क्रिकेटपटूंना मोठ्या स्तरावर खेळण्याची संधी मिळावी आणि स्थानिक टॅलेंटला चालना मिळावी हा यामागील मुख्य उद्देश आहे. ही केवळ स्पर्धा नसून जळगावकरांसाठी क्रिकेटचा मोठा उत्सव ठरेल.” या स्पर्धेत केवळ जळगाव जिल्हा क्रिकेट असोसिएशनने जाहीर केलेल्या आणि नोंदणीकृत खेळाडूंनाच सहभागी होता येणार आहे.
