पाचोरा, (प्रतिनिधी) : शहरातील बायपास रोडवर आज दुपारी एका भरधाव ट्रकने इलेक्ट्रिक पोलला जोरदार धडक देऊन पलटी झाल्याची भीषण घटना घडली. या अपघातात ट्रक चालक किरकोळ जखमी झाला असून, सुदैवाने रस्त्यावरून जाणाऱ्या इतर वाहनधारकांचे प्राण थोडक्यात बचावले आहेत.
आज दि. १९ मार्च रोजी दुपारी ११:३० ते १२ च्या सुमारास भडगाव बाजूकडून पहूरकडे जाणारा ट्रक (क्रमांक MH 19 CX 4699) पाचोरा बायपासवरून जात होता. यावेळी विकास कॉलनीकडून अचानक एक मोटारसायकलस्वार ट्रकसमोर आला. त्याला वाचवण्याच्या प्रयत्नात ट्रक चालकाचे नियंत्रण सुटले. ट्रकचा वेग जास्त असल्याने तो थेट दुभाजकावरील (डिव्हायडर) इलेक्ट्रिक पोलला धडकून विरुद्ध दिशेला जाऊन पलटी झाला.
हा ट्रक ऑईलने भरलेला होता. अपघात होताच परिसरात मोठी खळबळ उडाली. ट्रक पलटी झाल्यावर चालक राजू पाटील हा आत अडकला होता. मात्र, घटनास्थळी उपस्थित असलेले पोलीस कॉन्स्टेबल दीपक पाटील यांनी तत्परता दाखवत चालकाला सुखरूप बाहेर काढले. चालकाला किरकोळ दुखापत झाली असून त्याच्यावर उपचार सुरू आहेत.
बायपास रस्त्यावर जड वाहनांची वर्दळ मोठी असते, मात्र अनेक चालक अतिवेगाने वाहने चालवतात. या अपघातानंतर “बायपासवर जड वाहनांच्या वेगावर नियंत्रण असणे गरजेचे आहे,” असा सूर प्रत्यक्षदर्शी आणि बघ्यांनी व्यक्त केला.
