जळगाव, (प्रतिनिधी) : जळगाव शहरातील जनतेने आमच्या सर्व वरिष्ठ नेत्यांच्या नेतृत्वावर आणि धोरणांवर विश्वास ठेवून आम्हाला कौल दिला आहे. या विश्वासाला तडा जाऊ न देता, येणाऱ्या काळात प्रभागाचा सर्वांगीण विकास करणे हेच आमचे मुख्य ध्येय आहे, असे ठाम प्रतिपादन शिवसेनेचे जिल्हाप्रमुख विष्णू भंगाळे यांनी केले.
शनिवारी (दि. १७) रोजी विष्णू भंगाळे यांनी आपल्या निवासस्थानी पत्रकारांशी दिलखुलास संवाद साधला. यावेळी त्यांनी निवडणुकीदरम्यान झालेले आरोप-प्रत्यारोप आणि विविध वादांवर आपली भूमिका स्पष्ट केली.
आरोपांना कामातून उत्तर देणार..
निवडणुकीच्या काळात माझ्यावर झालेल्या विविध आरोपांबाबत बोलताना भंगाळे म्हणाले की, “माझ्यावर झालेल्या आरोपांना मी प्रतिआरोपांनी उत्तर देणार नाही. जनतेने दिलेला कौल आमच्यासाठी महत्त्वाचा आहे. भविष्यात विकासाची कामे करूनच मी सर्व आरोपांना उत्तर देईन.”
वाहनाची तोडफोड, गुन्हा दाखल
शिवसेना शिंदे गटाचे जिल्हाप्रमुख तथा नवनिर्वाचित नगरसेवक विष्णू भंगाळे यांच्या वाहनावर शुक्रवारी मध्यरात्री दगडफेक करून मागील काच फोडून नुकसान करण्यात आले. जिल्हापेठ पोलिस ठाण्यात चालकाने दिलेल्या तक्रारीवरून अदखलपात्र गुन्हा दाखल करण्यात आला आहे. ओंकार नगरात राहणारे भंगाळे यांच्या घराशेजारी असलेल्या पार्किंगमध्ये नेहमीप्रमाणे कार (क्र. एमएच ३९, एबी ९९९९) उभी करण्यात आली होती. गणेश भानुदास भोळे (रा.श्रद्धा कॉलनी) यांनी जिल्हापेठ पोलिस ठाण्यात फिर्याद दिली. त्यावरून अज्ञाताविरुद्ध अदखलपात्र गुन्ह्याची नोंद करण्यात आली.
मतदाराला मारहाण प्रकरणी गुन्हा दाखल
जळगाव महानगरपालिका निवडणुकीच्या मतदानादरम्यान आर. आर. विद्यालय मतदान केंद्रावर गुरुवारी दुपारी मोठा राडा झाला. बोगस मतदान करीत असल्याच्या संशयावरून अपक्ष उमेदवार ॲड.पीयूष नरेंद्र पाटील यांनी एका मतदाराला मतदान केंद्राबाहेर ओढून आणत कमरेत लाथ घालून मारहाण केली. फिर्यादी सुनील श्रीधर भंगाळे (रा. वाघळी, ता. चाळीसगाव) यांना मारहाण करण्यात आली होती. या राड्यामुळे सुनील भंगाळे आणि त्यांचे सहकारी पराग लक्ष्मण पाटील हे मतदानापासून वंचित राहिले. याप्रकरणी पोलिसांनी भारतीय न्याय संहिता (BNS) आणि लोकप्रतिनिधीत्व अधिनियमाच्या विविध कलमान्वये गुन्हा दाखल करण्यात आला आहे.
