जळगाव, (प्रतिनिधी) : नाशिक जिल्ह्यातील मालेगाव तालुक्यातील डोंगराळे परिसरात ४ वर्षांच्या निरागस चिमुरडीवर झालेल्या अमानुष अत्याचार आणि निघृण खून प्रकरणी संपूर्ण राज्यात संतापाची तीव्र लाट उसळली आहे. या भयावह घटनेमुळे सुवर्णकार समाजासह सर्वच समाजघटकांमध्ये तीव्र अस्वस्थता असून, आरोपीला कठोरात कठोर शिक्षा व्हावी यासाठी एकमुखी मागणी होत आहे.
या पार्श्वभूमीवर समाजातील विविध संघटनांनी एकत्र येत जळगावच्या जिल्हाधिकारी कार्यालयात जिल्हाधिकारी यांच्यामार्फत मुख्यमंत्री देवेंद्र फडणवीस यांना निवेदन पाठवले आहे. आरोपीला तात्काळ अटक करून फाशीची शिक्षा द्यावी. हे प्रकरण विलंब न लावता फास्ट-ट्रॅक न्यायालयात चालवावे. यासह इतर मागण्या निवेदनात करण्यात आल्या असून ‘निरपराध बालिकेचे जीवन हिरावून नेणारा नराधम समाजात राहण्यास पात्र नाही. न्याय मिळेपर्यंत समाज शांत बसणार नाही.’ असा इशारा देण्यात आला.
यावेळी महाराष्ट्र सुवर्णकार सेना जळगाव जिल्हा अध्यक्ष संजय बी. विसपुते, संत शिरोमणी नरहरी महाराज बहुउद्देशीय संस्था मेहरूणचे रमेश डी. सोनार, सुवर्णकार कारागीर संघ, अहीर सुवर्णकार महिला मंडळ, हितकारी सभा, खान्देश विभाग, आणि ऋणानुबंध वधू-वर पालक परिचय समितीच्या पदाधिकाऱ्यांसह समाजबांधवांनी एकत्र येत या प्रकरणाविरोधात तीव्र भूमिका घेतली आहे.
अशा गुन्ह्यांना आळा घालण्यासाठी शासनाने कठोर आणि तात्काळ शिक्षेची ठोस भूमिका घ्यावी, अशी अपेक्षा व्यक्त करण्यात येत आहे.
