चाळीसगाव, (प्रतिनिधी) : चाळीसगाव शहर पोलिसांनी नाकाबंदी दरम्यान एका वाहनातून तब्बल २५ लाख रुपये किमतीचा गांजा जप्त करीत मालेगावातील संशयिताला अटक केली आहे. संशयित आरोपीकडील चारचाकी वाहनही जप्त करण्यात आले आहे.
शेख नदीम शेख बशीर (वय ४०, गुलवानी खालदा, गल्ली नं. ३. मालेगाव, जि. नाशिक) असे अटकेतील संशयित आरोपीचे नाव आहे. चाळीसगाव शहर पोलीस बुधवारी पहाटेच्या सुमारास गस्तीवर असताना मालेगाव रोडवरील धुळे ते छत्रपती संभाजीनगर बायपास चौफुली येथे वाहनांची तपासणी करत होते. गस्तीवर पांढऱ्या रंगाची मारुती स्विफ्ट डिझायर (एम.एच.१२ के. एन. २३०५) ची तपासणी केली असता डिक्कीमध्ये निळ्या रंगाच्या चार प्लास्टिक पिशव्यात गांजासारखा वास असलेला पदार्थ आढळला. पोलीस निरीक्षक किरणकुमार कबाडी आल्यानंतर वाहनात गांजा असत्याचे स्पष्ट झाले. या गांजाचे एकूण वजन ४२ किलो ५८३ ग्रॅम असून त्याचे अंदाजित बाजारमूल्य २४ लाख ६९ हजार १५० रुपये आहे. गांजा वाहतुकीसाठी वापरलेली चारचाकी जप्त करण्यात आली. संशयित आरोपीविरोधात चाळीसगाव शहर पोलीस स्टेशनला गुन्हा दाखल करण्यात आला.
ही कारवाई जळगाव पोलीस अधीक्षक महेश्वर रेड्डी, अपर पोलीस अधीक्षकर कविता नेरकर, उपअधीक्षक राजेश चंदेल यांच्या मार्गदर्शनाखाली पोलीस निरीक्षक किरणकुमार कबाडी, पोलीस उपनिरीक्षक संदीप घुले, योगेश माळी, कैलास पाटील, अरुण बाविस्कर, पोलीस हवालदार राहुल सोनवणे, विनोद पाटील, योगेश बेलदार, अजय पाटील, पोलीस नाईक भूषण पाटील, राकेश पाटील, नितीन आगवणे, महेंद्र पाटील, नरेंद्र चौधरी, अमोल भोसले, नीलेश पाटील, नाना बच्चे, आशुतोष सोनवणे, विजू पाटील, राकेश महाजन, समाधान पाटील, दीपक चौधरी, पवन पाटील, महिला पोलीस शिपाई सबा शेख आदीच्या पथकाने केली.
