अमळनेर (प्रतिनिधी) : तालुक्यातील बोहरा मारवड रस्त्यावर भरधाव वेगाने येणाऱ्या चारचाकीने पायी जाणाऱ्या मजूर तरुणाला पाठीमागून धडक दिल्याने पादचारी गंभीर जखमी झाल्याची घटना २६ रोजी घडली आहे. याप्रकरणी मारवड पोलीस स्टेशनला गुन्हा दाखल करण्यात आला आहे.
तालुक्यातील बोहरा – मारवड रस्त्यावर दि. २६ रोजी दुपारी १२:३० वाजेच्या सुमारास संजय रमेश भील (रा. बोहरा) हा तरुण मजुरीसाठी पायी जात असताना मारवडकडे जाणाऱ्या आर्टीगा (क्र. एमएच ४७ एएन ५६७१) वरील चालक सुधीर विश्वासराव पाटील (रा. बोहरा) याने हयगयीने वाहन चालवत संजय याला पाठीमागून धडक दिली. तसेच पुढे जाऊन गाडी निंबाच्या झाडाला कार ठोकली.
या अपघातात धडकेमुळे संजय फेकला जाऊन त्याच्या मानेला व डोक्याला गंभीर दुखापत झाली. त्यास अमळनेर येथे खाजगी रुग्णालयात दाखल केले असता डॉक्टरांनी धुळे नेल्याचा सल्ला दिल्याने त्यास धुळे येथे खाजगी रुग्णालयात दाखल करण्यात आले आहे. जखमीचा भाऊ लक्ष्मण रमेश भील याच्या फिर्यादीवरून मारवड पोलिसांत सुधीर विश्वासराव पाटील याच्याविरुद्ध गुन्ह्याची नोंद करण्यात आली आहे. पुढील तपास पोहेकॉ संजय पाटील हे करीत आहेत.
