पहा कोणकोणते कलावंत कला सादरीकरण करणार
जळगाव, (प्रतिनिधी) : स्व वसंतराव चांदोरकर स्मृती प्रतिष्ठानाच्या वतीने जळगावात ‘बालगंधर्व संगीत महोत्सवाचे आयोजन दि. ३, ४, ५ जानेवारी २०२५ रोजी करण्यात येणार आहे. हा महोत्सव छत्रपती संभाजीराजे नाट्य मंदिरात संध्याकाळी ७ ते ११ या वेळेत संपन्न होणार आहे. अशी माहिती पत्रकार परिषदेमध्ये देण्यात आली. यावेळी प्रतिष्ठानचे अध्यक्ष डॉ. विवेकानंद कुलकर्णी, उपाध्यक्ष दीपिका चांदोरकर, विश्वस्त शरदचंद्र छापेकर, डॉ. अपर्णा भट, दीपक चांदोरकर, अरविंद देशपांडे, जैन इरिगेशनचे अनिल जोशी उपस्थित होते.
या महोत्सवात राष्ट्रीय आंतरराष्ट्रीय ख्यातीच्या कलावंतांना प्रतिष्ठानतर्फे निमंत्रित करण्यात आले आहे. महोत्सवाची सुरुवात दि.३ जानेवारी रोजी होणार असून उदघाटन समारंभानंतर प्रथम सत्रात बेंगलोर येथील रेश्मा भट व रमैया भट यांच्या शास्त्रीय व उपशास्त्रीय गायनाने होणार आहे. त्यांना संवादिनीवर अभिनव रवदे तर तबल्यावर रामकृष्ण करंबेळकर साथसंगत करतील.
द्वितीय सत्र जुगलबंदीने सादर होणार आहे. यामध्ये कोलकाता येथील भाऊ व बहीण बासरी व गायनाची जुगलबंदी सादर करतील. केवळ १५ वर्षांचा अनिरबन रॉय व त्याची बहिण मैत्रेयी रॉय हे दोन कलावंत सन २०२२ मध्ये एका रीऍलिटी शो मधील आपल्या सादरीकरणाने अनिरबनने सर्वांचे लक्ष वेधून घेतले होते. त्यांना तबल्याची साथ कोलकात्याची रीषा शिवा करणार आहे.
महोत्सवाचे द्वितीय दिनाचे प्रथम सत्र बेंगलोरचाच गायक अनिरुध्द ऐटल सादर करणार आहे. ते शास्त्रीय व उपशास्त्रीय गायन सादर करतील. त्यांना संवादिनीवर अभिनव रवंदे तर तबल्यावर रामकृष्ण करंबेळकर साथसंगत करतील. द्वितीय दिनाचे द्वितीय सत्र दिल्ली येथील प्रख्यात नृत्यांगना, अभिनेत्री, व पं बिरजू महाराजांची नात शिंजीनी कुलकर्णी कथक नृत्य सादर करतील. त्यांना तबल्याची साथ योगेश गंगाणी, संवादिनी गायन साथ सामी उल्हाह खान, पढतची साथ अश्विनी सोनी, तसेच सतार ची साथ पंडिता प्राजक्ता गुर्जर करतील
तृतीय दिनाचे प्रथम सत्र ‘तबला क्वीन’ या उपादीने सन्मानित झालेल्या कोलकत्याची तबला वादक रींपा शिव आपल्या एकल तबला वादनाने रसिकांना मंत्रमुग्ध करतील. रीपा यांना संवादिनीवर नगम्याची साथ अभिषेक रवंदे करतील.
समारोपाच्या सत्रात नंदिनी शंकर (व्हायोलिन) व महेश राघवन (जिओ श्रेड) या वाद्यावर जुगलबंदी सादर करणार आहेत. त्यांना तबल्याची साथ प्रख्यात तबला वादक तनय रेगे करणार आहेत. २३ व्या बालगंधर्व संगीत महोत्सवाची यावर्षीची सुसंवादिनी अभिनेत्री जुई भागवत असणार आहे. जळगावकर रसिकांनी मोठ्या संख्येने उपस्थिती देऊन वा बालगंधर्व संगीत महोत्सवाचा आस्वाद घ्यावा असे आवाहन स्व वसंतराव चांदोरकर स्मृती प्रतिष्ठानच्या वतीने करण्यात आले आहे.
