स्थानिक गुन्हे शाखेची कारवाई ; ६ दुचाकी हस्तगत
जळगाव (प्रतिनिधी) : जळगाव स्थानिक गुन्हे शाखेच्या पथकाने जळगाव जिल्ह्यासह धुळे जिल्ह्यातून दुचाकींची चोरी करणाऱ्या आरोपीला चोपडा तालुक्यातील कर्जाणा गावातून रविवारी दि. ८ सप्टेंबर रोजी अटक केली असून त्याच्याकडून चोरीच्या एकुण सहा दुचाकी जप्त करण्यात आल्या असल्याची माहिती पोलीस अधीक्षक डॉ. महेश्वर रेड्डी यांनी सोमवारी पत्रकार परिषदेत दिली.
दीपक सुमाऱ्या बारेला (वय -२९ रा. कर्जाणा ता. चोपडा) असे अटक केलेल्या दुचाकी चोरट्याचे नाव आहे. जळगाव स्थानिक गुन्हे शाखेचे कर्मचारी संदीप पाटील आणि प्रवीण मांडोळे हे चोपडा तालुक्यात गस्त घालीत असतांना त्यांना दीपक बारेला हा चोरीची दुचाकी घेऊन फिरत असल्याची गोपनीय माहिती मिळाली. याबाबत त्यांनी स्थानिक गुन्हे शाखेचे वरिष्ठ पोलीस निरीक्षक बबन आव्हाड यांना माहिती दिली. त्यानुसार त्यांनी पथकातील संदीप पाटील, प्रवीण मांडोळे, नंदलाल पाटील, भगवान पाटील, राहुल कोळी, गोरख बागुल, राहुल बैसाणे, प्रमोद ठाकूर असे पथक चोपडा तालुक्यातील कर्जाणा गावात रवाना केले.
दरम्यान संशयित आरोपी हा त्याच्या गावात कर्जाणा येथे आल्याची माहिती मिळाल्यानंतर पथकाने सापळा रचून त्याला अटक केली. त्याची चौकशी केली असता त्याने पाचोरा, पारोळा आणि धुळे जिल्ह्यातील मोहाडी या ठिकाणाहून वेगवेगळ्या ६ दुचाकी चोरी केल्याचे कबुली दिली. पुढील कारवाईसाठी त्याला पाचोरा पोलिसांच्या ताब्यात देण्यात आले आहे.
