जळगाव, प्रतिनिधी : यावल तालुक्यातील किनगाव येथे राष्ट्रीय स्वयंसेवक संघाच्या पथसंचलनादरम्यान तसेच पोलिसांवर झालेली दगडफेक ही अत्यंत दुर्दैवी घटना आहे. काही समाजकंटकांकडून अशा प्रकारे दहशत निर्माण करण्याचा प्रयत्न केला जात असल्याचा आरोप माजी खासदार किरीट सोमय्या यांनी केला. जळगाव येथे आयोजित पत्रकार परिषदेत ते बोलत होते.
किनगाव येथील दगडफेक प्रकरणातील दोषींना तातडीने तडीपार करण्यात यावे, अशी ठाम मागणी सोमय्या यांनी केली. राज्याचे मुख्यमंत्री तथा गृहमंत्री देवेंद्र फडणवीस यांनी या घटनेची गंभीर दखल घेत संबंधित दोषींवर कठोर कारवाई करण्याचे निर्देश दिल्याचेही त्यांनी सांगितले.
विजयादशमीनिमित्त अनेक वर्षांनंतर पोलिसांकडून पथसंचलनाला परवानगी देण्यात आली होती. मात्र, या वेळी घडलेल्या दगडफेकीच्या घटनेमुळे वातावरण तणावपूर्ण झाले. या प्रकरणी जळगाव पोलिसांनी तत्परतेने कारवाई करत ५७ जणांविरुद्ध गुन्हे दाखल केले असून, १७ जणांना अटक केली आहे. पोलिसांनी केलेल्या या कारवाईबद्दल किरीट सोमय्या यांनी पोलिसांचे अभिनंदन केले.
यावेळी बोलताना त्यांनी आगामी काळात राज्यात समान नागरी कायदा लागू होणार असल्याचेही नमूद केले.
या पत्रकार परिषदेला आमदार अमोल जावळे, महापौर दीपमाला काळे, भाजपचे पश्चिम जिल्हाध्यक्ष डॉ. राधेश्याम चौधरी, पूर्व जिल्हाध्यक्ष चंद्रकांत बाविस्कर, महानगर जिल्हाध्यक्ष दीपक सूर्यवंशी, जिल्हा पदाधिकारी डॉ. केतकी पाटील, नगरसेवक अरविंद देशमुख यांच्यासह अनेक प्रमुख पदाधिकारी आणि कार्यकर्ते उपस्थित होते.
