जळगाव | ०९ ऑगस्ट २०२४ | घरगुती वादातून दारूच्या नशेत असलेल्या पतीने पत्नीला मारहाण करून दोन्ही हातांवर धारदार ब्लेडने वार करून दुखापत केल्याची घटना बुधवारी दुपारी १२.३० वाजता गणेश कॉलनी येथे घडली आहे. याप्रकरणी सायंकाळी ४ वाजता जिल्हापेठ पोलीस ठाण्यात पतीविरोधात गुन्हा दाखल करण्यात आला.
शितल संजय साळुंखे (वय-४०, रा. गणेश कॉलनी) या पती संजय यशवंतराव साळुंखे (वय-५२) यांच्यासोबत वास्तव्याला आहे. बुधवारी दुपारी १२.३० वाजता पतीपत्नीत घरगुती वाद निर्माण झाला. त्यानंतर पती संजय साळुंखे हा दारूच्या नशेत असतांना त्यांची पत्नी शितल साळुंखे यांना मारहाण करून त्यांच्या दोन्ही हातांवर धारदार ब्लेडने वार करून गंभीर दुखापत केली.
दरम्यान महिलेने दुपारी ४ वाजता जिल्हापेठ पोलीस ठाण्यात धाव घेऊन पती विरोधात तक्रार दिली आहे. त्यानुसार संजय यशवंतराव साळुंखे यांच्या विरोधात सायंकाळी ४ वाजता जिल्हापेठ पोलीस ठाण्यात गुन्हा दाखल करण्यात आला. या घटनेचा पुढील तपास महिला पोलीस कॉन्स्टेबल भारती देशमुख या करीत आहे.
