जळगाव | दि.१४ जुलै २०२४ | शेततळे कामांचा ठेका मिळवून देण्याच्या नावाखाली ४५ लाख रुपयांची फसवणूक करणाऱ्या निवृत्त अभियंता व्ही. डी. पाटील यांच्यासह ८ जणांविरुद्ध गुन्हा दाखल करण्याचे आदेश जळगाव न्यायालयाने दिले आहेत. तापी पाटबंधारे विकास महामंडळ जळगाव यांचे अंतर्गत विविध कंपन्यांकडून सीएसआर फंडाच्या माध्यमातून शेततळे कामांचा ठेका मिळवून देण्याच्या नावाने ४५ लाखांची फसवणूक झाल्याचा प्रकार समोर आलायं.
यासंदर्भात पत्रकार परिषद घेऊन अजय बडे यांनी सविस्तर माहिती दिली. जळगाव येथील व्यावसायिक अजय भागवत बढे यांना तापी पाटबंधारे विकास महामंडळ, जळगाव यांचे अंतर्गत शेततळे कामांचा ठेका मिळवून देतो असे सांगून निवृत्त वरिष्ठ अभियंता, कार्यकारी अभियंता, तीन सनदी लेखापाल, कंपनीचे संचालक व अन्य दोघे जण यांनी संगनमत करून त्यांचेकडून ४५ लाख रुपये घेतले होते. विशेष म्हणजे अत्यंत चलाखीने व नियोजनबद्ध पद्धतीने आरोपींनी अजय बढे यांना सीएसआर फंड मिळवण्यासाठी चंदिगढ, मुंबई येथे नेवून ४५ लाख रुपये उकळले. मात्र, संबंधितांनी पैसे उकळून देखील शेततळे कामांचा ठेका मिळवून दिला नाही व घेतलेले पैसे परत करण्यास टाळाटाळ केल्याने आपली फसवणूक झाल्याचे लक्षात आल्याने अजय बढे यांनी गुन्हा दाखल करण्याबाबत तक्रार अर्ज केले होते.
मात्र, या अर्जावर कोणतीही कार्यवाही होत नसल्याने अजय बढे यांनी तत्कालीन पोलीस अधिक्षक एम. राजकुमार यांची समक्ष भेट घेवून तक्रार केली होती. विषयाचे गांभीर्य लक्षात घेवून पोलिस अधिक्षकांनी आर्थिक गुन्हे शाखेला चौकशी करण्याचे निर्देश दिले होते. याप्रकरणात तापी पाटबंधारे विकास महामंडळ, जळगाव येथील निवृत्त वरिष्ठ अभियंता व्हि. डी. पाटील, कार्यकारी अभियंता गोकुळ महाजन, सुहास भट (सनदी लेखापाल), सूर्या चौहान (संचालक-गोल्ड रिव्हर कंपनी, मुंबई), पंकज नेमाडे, ललित चौधरी, पवन कोलते (सनदी लेखापाल), व्हि. के. जैन (सनदी लेखापाल) यांच्या विरोधात बडे यांनी न्यायालयात दाद मागितली होती त्यावर न्यायालयाने मंगळवारी आदेश दिले.
अजय बढे यांनी जळगाव न्यायालयांत धाव घेवून संगनमत करून ४५ लाखात फसवणूक करणाऱ्यांविरुद्ध गुन्हा दाखल करण्यासाठी याचिका दाखल केली होती. या प्रकरणी सर्व कागदपत्रे व परिस्थिती लक्षात घेवून जळगाव न्यायालयाने वरिष्ठ स्तर न्यायाधीश श्रीमती जानव्ही केळकर यांनी रामानंद नगर पोलिस ठाण्यात गुन्हा दाखल करण्याचे निर्देश दिले आहेत.
