पाचोरा, दि. २८ – केंद्र सरकारने लागू केलेल्या अग्निपथ योजनेच्या विरोधात सोमवारी पाचोरा तालुका काँग्रेस कमिटी तर्फे तालुकाध्यक्ष सचिन सोमवंशी यांच्या नेतृत्वात निदर्शने आंदोलन करण्यात आले. यावेळी जोरदार घोषणा देण्यात आल्या. तसेच अग्निपथ योजना त्वरित रद्द करावी, अन्यथा काँग्रेस पक्ष रस्त्यावर उतरल्या शिवाय राहणार नाही असा इशारा देण्यात आला.
केंद्र सरकार नेहमी जनविरोधी कायदे आणि योजना आणून जनतेचे, तरुणांचे भवितव्य खराब करत आहे. केंद्र सरकारने अग्निपथ ही योजना तरुणांसाठी सैन्यदलात भरती होण्यासाठी आणली आहे. या योजनेत भरती होणाऱ्या तरुणांना अग्निविर म्हटले जाणार असून अग्निपथ योजना तरुणाच्या भावनांशी खेळणारी असून युवकांचे आयुष्य उदध्वस्त करणारी असल्याचा आरोप यावेळी करण्यात आला.
आंदोलना प्रसंगी काँग्रेसचे तालुकाध्यक्ष सचिन सोमवंशी, शेख इस्माईल शेख फकिरा, इरफान इकबाल मन्यार, संगीता रविंद्र नेवे, शरीफ सादीक शेख, इस्माईल तांबोळी, प्रभाकर अहिरे, अलताफ महेबूब पठाण, अमजद खान, इरफान पठाण, रवि सुरवाडे, शिवदास महाजन, सदु जाधव आदी कार्यकर्ते उपस्थित होते.
