गजानन पाटील | अमळनेर, दि.२८ – ग्रामसेवक हा गाव व शासन यांच्यातील समन्वय साधणारे पद असून या पदामुळेच गावच्या विकासाला हातभार लागत असतो. असे प्रतिपादन येथील जेष्ठ पत्रकार घन:श्याम टाक यांनी याप्रसंगी केले. तालुक्यातील कळमसरे येथे ग्रामविस्तार अधिकारी एस.डी. सोनवणे यांचा सेवानिवृत्त निमित्त झालेल्या कार्यक्रमात ते बोलत होते.
एस.डी. सोनवणे यांचा सेवापूर्ती सोहळा नुकताच पार पडला. कळमसरेत त्यांनी सन २०११ साली ग्रामसेवक पदाची जबाबदारी स्वीकारली, जवळपास १० ते १२ वर्षे सोनवणे यांनी अविरत पणे ग्रामसेवक पदाची सेवा बजावली. यानिमित्ताने कळमसरे ग्रामपंचायत व गावाच्या वतीने सरपंच जगदीश निकम, उपसरपंच जितेंद्र राजपूत तसेच ग्रामपंचायत सदस्य यांचा हस्ते यथोचित सत्कार करण्यात आला.
त्यांच्या कार्यकाळात लोकप्रतिनिधींना सोबत घेत शासन दरबारी योग्य रितीने पाठपुरावा करून गाव विकसित करण्यावर त्यांनी भर दिला. कामाच्या पद्धतीने मुळे सोनवणे यांची पारोळा येथील कृषी विभागात कृषी विस्तार अधिकारी म्हणून पदोन्नती करण्यात आली आहे. दरम्यान ३१ मे रोजी त्यांचा सेवा कार्यकाळ संपुष्टात येणार असून गुरूवारी निरोप समारंभ करण्यात आला. यावेळी ग्रामपंचायत सरपंच, उपसरपंच, ग्रामस्थ भावुक झाले होते तर, गावाशी असलेली नाळ तुटणार म्हणून ग्रामविकास अधिकारी एस डी सोनवणे यांचेदेखील डोळे पाणावले.
