बोदवड, दि. २५ – तालुक्यातील शेलवड येथील अकरावीच्या वर्गात शिक्षण घेत असलेल्या विद्यार्थिनीचा चालत्या रिक्षातून पडून मृत्यू झाल्याची दुर्दैवी घटना शुक्रवारी बोदवड तालुक्यातील शेलवड येथे घडली. कॉलेज संपल्यानंतर रिक्षातून घरी जात असतांना अचानक पडल्याने विद्यार्थिनीला आपले प्राण गमवावे लागले.
तृप्ती भगवान चौधरी असं अपघातात मृत्यू झालेल्या १७ वर्षिय विद्यार्थिनीचे नाव आहे. अपघातात गंभीर जखमी झालेल्या तृप्तीला उपचारासाठी जळगावला नेत असताना रस्त्यातच तीची प्राणज्योत मालवली. या घटनेमुळे सर्वत्र हळहळ व्यक्त होत आहे.
राज्यात एसटीचा संप सुरू असल्याने सर्व विद्यार्थ्यांना खासगी वाहनांनी प्रवास करावा लागतोय. दरम्यान काही खासगी वाहतूकदार क्षमतेपेक्षा जास्त प्रवाशी बसवून धोकादायक वाहतूक करतात. रिक्षाचालकाचा बेजबाबदारपणा आणि वाहतूक विभागाचे अक्षम्य दुर्लक्षामुळे शेलवड येथील तरूणीचा जीव गेला असल्याचे नागरिकांमधून बोलले जातेयं.
