जळगाव, दि. २२ – साडे तीन मुहूर्ता पैकी एक पुर्ण मुहूर्त असलेल्या गुढी पाडव्याच्या निमित्ताने स्व.वसंतराव चांदोरकर स्मृती प्रतिष्ठानतर्फे गीत रामायणा वर आधारीत दृक-श्राव्य माध्यमातून नर्तन-कीर्तनाचा सुरेल संगम असलेली एक अंकी नृत्य नाटिका शनिवारी २ एप्रिल रोजी जळगावातील छत्रपती संभाजीराजे नाट्यमंदिरात संध्याकाळी ७ ते ९ वेळेत आयोजित करण्यात आली आहे. या कार्यक्रमाला डॉ.भवरलाल व कांताबाई फाऊंडेशनचे सहकार्य लाभले आहे.
प्रभू रामांचे दिव्य कथा संकीर्तन युगानुयुगे सुरूच राहिल इतके ते सामर्थ्यवान आहे. आधुनिक वाल्मिकी म्हणून ज्यांचा गौरव केला जातो अश्या कै.ग.दि.माडगूळकर यांनी रचलेल्या अजरामर रचनांना कै.सुधिर फडके यांनी संगीत देऊन गीत रामायण घराघरात पोहोचविले, आणि हेच दिव्य गीत रामायण हाच या नृत्य नाटिकेचा मुळ गाभा. किर्तन परंपरेतील आदिगुरू देवर्षी नारद मुनी आणि नर्तन परंपरेचे आद्यप्रवर्तक आदिगुरू भरत मुनी या दोन्ही भारतीय कला परंपरांचा संगम या नृत्य नाटिकेत झाला आहे.
संत एकनाथ महाराजांचे श्री भावार्थरामायण संत तुलसीदास यांचे श्री रामचरितमानस सद्गुरू अनिरुद्ध बापूंचे श्री रामरसायन या सर्व दिव्य ग्रंथांचे मार्गदर्शन या रचनेस लाभले आहे. पद्मभूषण गुरु डॉक्टर पद्मा सुब्रमण्यम यांनी पुनरुज्जीवित केलेली भरत नृत्यम् ही नाट्य शास्त्रावर आधारित मार्गी नृत्यशैली हे याचे वैशिष्ट्य आहे. गीतरामायणा याशिवाय या नृत्यनाटिकेत किर्तन आख्यानातील पदे, आर्या, दिंडी इ. तर सादर होतेच पण प्रत्येक रचने पूर्वी निरुपण सादर होते.
