जळगाव, प्रतिनिधी : असोदा रोड परिसरात घरामागील खुली वायर कट करताना विजेचा तीव्र धक्का लागल्याने मुलगा आणि त्याला वाचवण्यासाठी धावलेली आई अशा माय-लेकाचा उपचारापूर्वीच जागीच दुर्दैवी मृत्यू झाला. सुनंदा राजू सपकाळे (वय ५०) आणि राहुल राजू सपकाळे (वय ३०, रा. असोदा रोड, जळगाव) असे मृत माय-लेकाची नावे आहे.

मंगळवारी सकाळी असोदा रोड येथील राहत्या घरामागे खुली वायर कट करण्यासाठी राहुल सपकाळे गेले होते. यादरम्यान अचानक आलेल्या विद्युत प्रवाहामुळे त्यांना तीव्र विजेचा धक्का बसला. मुलाला पाहताच आई सुनंदा सपकाळे यांनी त्याला वाचवण्यासाठी त्वरित धाव घेतली. मात्र, मुलाला सोडवण्याचा प्रयत्न करत असताना त्यांनाही विजेचा जोरदार धक्का बसला आणि दोघेही गंभीर जखमी झाले.

घटनेची माहिती मिळताच आजूबाजूच्या नागरिकांनी तातडीने धाव घेत दोन्ही माय-लेकांना उपचारासाठी शासकीय वैद्यकीय महाविद्यालय व रुग्णालयात दाखल केले. मात्र, तिथे तपासणी केल्यानंतर वैद्यकीय अधिकाऱ्यांनी त्यांना मृत घोषित केले. एकाच घरातील माय-लेकाचा असा अचानक मृत्यू झाल्याने रुग्णालयात नातेवाईकांनी आणि नागरिकांनी मोठी गर्दी केली होती.
अचानक घडलेल्या या दोन मृत्यूंमुळे मयत महिलेचे पती राजू सपकाळे व इतर कुटुंबीयांना जबर मानसिक धक्का बसला असून, परिसरात शोककळा पसरली आहे. या घटनेची माहिती मिळताच पोलिसांनी घटनास्थळी जाऊन पाहणी केली असून, पुढील तपास सुरू आहे.








