उघड्यावर मांस विक्री करणाऱ्यांवर कारवाई करा; महापौरांचे प्रशासनाला निर्देश

दंडात्मक कारवाई, नोटिसा आणि उपाययोजनांचा सविस्तर अहवाल तातडीने सादर करण्याचे आदेश

जळगाव, प्रतिनिधी : जळगाव शहरात उघड्यावर मांस विक्री करणाऱ्या विक्रेत्यांविरुद्ध दंडात्मक कारवाई करण्याच्या महासभेतील ठरावाची अंमलबजावणी करण्याचे निर्देश महापौर दीपमाला मनोज काळे यांनी महापालिका प्रशासनाला दिले आहेत. या प्रकरणात आतापर्यंत करण्यात आलेल्या कार्यवाहीचा सविस्तर अहवाल तातडीने महापौर कार्यालयात सादर करण्याचे आदेश त्यांनी दिले आहेत.
महासभेत नगरसेवकांसह नागरिकांनी केलेल्या मागणीच्या अनुषंगाने उघड्यावर मांस विक्री करणाऱ्यांवर दंडात्मक कारवाई करण्याचा ठराव मंजूर करण्यात आला होता. त्यानुसार संबंधित विभागाने आजपर्यंत कोणती पावले उचलली, याची माहिती महापौरांनी मागविली आहे.
उघड्यावर मांस विक्री करणाऱ्या किती विक्रेत्यांवर दंडात्मक कारवाई करण्यात आली, किती जणांना नोटिसा बजावण्यात आल्या आणि अशा प्रकारची विक्री पूर्णपणे थांबविण्यासाठी कोणत्या उपाययोजना केल्या, याचा तपशील अहवालात देण्याचे निर्देश देण्यात आले आहेत.
महासभेतील ठरावाची अद्याप अंमलबजावणी झाली नसेल, तर संबंधित विभागाने विलंब न करता आवश्यक ती कार्यवाही करावी. उघड्यावर मांस विक्री करणाऱ्यांविरुद्ध नियमानुसार दंडात्मक कारवाई करून त्यावर नियंत्रण आणावे, असेही महापौर दीपमाला काळे यांनी स्पष्ट केले आहे. संबंधित उपायुक्तांनी या संपूर्ण कार्यवाहीचा अहवाल तातडीने महापौर कार्यालयाकडे सादर करावा, असे पत्रात नमूद करण्यात आले आहे.








