जामनेर, दि.०३ – येथील ऋषिकेश नर्सरी भागात सायंकाळच्या सुमारास एका अज्ञात वाहनाच्या धडकेत बिबट्या ठार झाल्याची घटना बुधवारी घडलीये. दरम्यान जामनेर कडून बोदवडकडे जाणाऱ्या मार्गावर शहरापासून सुमारे तीन किलोमीटर अंतरावर ही घटना घडली असून अज्ञात वाहन चालक फरार झाला आहे.
या घटनेत बिबट्याचा जागीच मृत्यू झाला असल्याचे सांगण्यात आले. जामनेर ते बोदवड मार्ग या राखीव वनक्षेत्राच्या अगदी लगत आहे. काही प्रत्यक्षदर्शींनी या घटनेची माहिती वन विभागाच्या कर्मचाऱ्यांना दिल. माहिती मिळताच वन परिक्षेत्र अधिकारी अमोल पंडित यांच्या सूचनेवरून वनरक्षक ठोंबरे, पी एस भारुडे, प्रशांत पाटील, वनपाल सुनील पाटील, प्यारेलाल महाजन, विकास गायकवाड आदींसह कर्मचाऱ्यांनी घटनास्थळी जाऊन बिबट्याचा मृतदेह ताब्यात घेतला.
या पथकाने बिबट्याचा मृतदेह वनपरिक्षेत्र कार्यालयाच्या आवारात आणून तेथे वरिष्ठ अधिकाऱ्यांनी बिबट्याच्या मृतदेहाचे निरीक्षण केले. दरम्यान पशु वैद्यकीय अधिकारी डॉ.श्रीकांत व्यवहारे शवविच्छेदन करणार असून त्यानंतर मृत बिबट्यावर अंत्यसंस्कार केले जाणार आहेत .
बिबट्यांसह या जंगलातील वन्यपशुंना मुक्तसंचार करता यावा, त्यांचा नैसर्गिक अधिवास माणसांकडून किंवा अन्य कोणत्याही कारणांनी बाधित होऊ नये म्हणून, यापुढे उपाययोजना केल्या जाव्यात अशी मागणी वन्यजीव प्रेमींकडून केली जात आहे.
