पाचोरा, प्रतिनिधी : परधाडे ते पाचोरा रेल्वे स्थानकादरम्यान धावत्या रेल्वेतून तोल जाऊन खाली पडल्याने ३६ वर्षीय तरुणाचा मृत्यू झाल्याची घटना ५ ऑक्टोबर रोजी सकाळी १० वाजेच्या सुमारास घडली. संजय अनिल पाटील (वय ३६, रा. दुसखेडा, ता. पाचोरा) असे मृताचे नाव आहे.
संजय पाटील हे अहमदाबाद येथील एका खासगी कंपनीत वेल्डिंगचे काम करीत होते. ४ ऑक्टोबर रोजी ते अहमदाबादहून खासगी प्रवासी वाहनाने जळगाव येथे आले होते. त्यानंतर जळगावहून पाचोरा येथे जाण्यासाठी ते रेल्वेने प्रवास करीत होते. दरम्यान, परधाडे-पाचोरा दरम्यान रेल्वे किलोमीटर खांब क्रमांक ३८१/२६ जवळ त्यांचा तोल जाऊन ते धावत्या रेल्वेतून खाली पडले.
या घटनेची माहिती मिळताच पाचोरा पोलिस ठाण्याचे पोलीस कॉन्स्टेबल कमलेश पाटील यांनी घटनास्थळी धाव घेतली. पंचनामा करून मृतदेह पाचोरा ग्रामीण रुग्णालयात हलविण्यात आला. याप्रकरणी पाचोरा पोलिस ठाण्यात अकस्मात मृत्यूची नोंद करण्यात आली आहे.
