जळगाव, प्रतिनिधी : शहरातील मेहरुण परिसरातील छत्रपती शिवाजी उद्यान भागात रस्त्याच्या मधोमध असलेल्या उघड्या गटारीत दुचाकी पडल्याने नवल अर्जुन सोनवणे (३७, रा. रामेश्वर कॉलनी) या तरुणाचा दुर्दैवी मृत्यू झाला. सोमवार, ५ ऑक्टोबर रोजी दुपारी साडेबारा वाजेच्या सुमारास ही घटना घडली. रस्त्याचे काम करणाऱ्या मक्तेदाराच्या हलगर्जीपणामुळेच नवल यांचा बळी गेल्याचा संतापजनक आरोप त्यांच्या नातेवाईकांनी केला आहे.
नातेवाईकांच्या माहितीनुसार, नवल सोनवणे हे मेहरुण परिसरातील काम आटोपून दुचाकीने रामेश्वर कॉलनीतील आपल्या घरी परतत होते. छत्रपती शिवाजी उद्यान परिसरात नवीन रस्त्याचे काम पूर्ण झाले आहे. मात्र, या रस्त्यावरून पुढे जात असताना नव्याने बांधण्यात आलेल्या गटारीचे काम अपूर्ण अवस्थेत सोडण्यात आले होते. गटारीवर कोणताही ढापा टाकण्यात आलेला नव्हता.
नवल दुचाकीवरून पुढे जात असताना त्यांना रस्त्याच्या मधोमध असलेल्या उघड्या गटारीचा अंदाज आला नाही. अचानक दुचाकी गटारीच्या ब्लॉकमध्ये जाऊन अडकल्याने नवल जोरात खाली कोसळले. या दुर्घटनेत त्यांच्या डोक्याला गंभीर दुखापत झाली. त्यांचा जागीच मृत्यू झाला.
रस्त्याचे आणि गटारीचे काम सुरू असतानाही या ठिकाणी सुरक्षेच्या दृष्टीने कोणतीही खबरदारी घेण्यात आली नसल्याचा आरोप नातेवाईकांनी केला आहे. उघड्या गटारीभोवती संरक्षण व्यवस्था करण्यात आली नव्हती, तसेच वाहनचालकांना धोक्याची सूचना देणारा फलकही लावण्यात आलेला नव्हता. गटारीवर सुरक्षेच्या दृष्टीने कल्व्हर्ट अथवा अन्य व्यवस्था केली असती किंवा किमान सूचना फलक लावला असता, तर नवल यांचा जीव वाचला असता, असा दावा नातेवाईकांनी केला आहे.
नवल सोनवणे हे एमआयडीसी परिसरातील एका चटई कंपनीत काम करून कुटुंबाचा उदरनिर्वाह चालवत होते. त्यांच्या पश्चात पत्नी, दोन लहान मुले आणि एक भाऊ असा परिवार आहे. विशेष म्हणजे, त्यांच्या वडिलांचे गेल्या वर्षीच निधन झाले होते. त्यामुळे कुटुंबाची संपूर्ण आर्थिक जबाबदारी नवल यांच्यावर होती. त्यांच्या अचानक मृत्यूने कुटुंबाचा आधारच हरपल्याने सोनवणे कुटुंबावर दुःखाचा डोंगर कोसळला आहे.
