जळगाव, विशेष प्रतिनिधी : चाळीसगाव तालुक्यातील मेहुणबारे गावात मध्यरात्री घरफोडीची घटना समोर आली आहे. अज्ञात चोरट्यांनी बंद घराच्या दरवाजाची कडी तोडून आत प्रवेश केला आणि कपाटात ठेवलेले ६१ हजार ६०० रुपये किमतीचे सोन्याचे दागिने चोरून नेले. या प्रकरणी मेहुणबारे पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे. निर्मला यशवंत महाजन (वय ४८, व्यवसाय-शेती, रा. नवेगाव, मेहुणबारे, ता. चाळीसगाव) यांनी दिलेल्या फिर्यादीवरून हा गुन्हा नोंदवण्यात आला आहे.
पोलिसांनी दिलेल्या माहितीनुसार, २१ ऑगस्ट २०२६ रोजी मध्यरात्री १.३० ते सकाळी ७.४५ वाजेच्या दरम्यान फिर्यादी यांच्या मेहुणबारे येथील राहत्या घरी कोणीतरी अज्ञात चोरट्याने प्रवेश केला. चोरट्याने मुख्य दरवाजाची कडी तोडून घरात शिरून कपाटात ठेवलेले दागिने चोरले.
या चोरीमध्ये २८ हजार ६०० रुपये किमतीचा १३ ग्रॅम वजनाचा सोन्याचा नेकलेस, २८ हजार ६०० रुपयांची १३ ग्रॅम वजनाची लहान सोन्याची साखळी आणि ४ हजार ४०० रुपयांचा २ ग्रॅम वजनाचा शुद्ध सोन्याचा तुकडा असा एकूण ६१ हजार ६०० रुपयांचा सोन्याचा ऐवज लंपास करण्यात आला.
अज्ञातावर गुन्हा दाखल
सकाळी घरफोडीचा प्रकार निदर्शनास आल्यानंतर निर्मला महाजन यांनी मेहुणबारे पोलीस ठाण्यात जाऊन तक्रार दिली. यावरून पोलिसांनी अज्ञात चोरट्याविरुद्ध गुन्हा दाखल केला आहे. सहाय्यक पोलीस निरीक्षक नितीन पाटील यांच्या मार्गदर्शनाखाली पोलीस नाईक नंदकिशोर महाजन या प्रकरणाचा पुढील तपास करत आहेत.
