अकलूद शिवारातील कथित कुंटणखान्यावर पोलिसांचा छापा; चार महिलांची सुटका
पंटर पाठवून खात्री केल्यानंतर कारवाई; घरात वेश्याव्यवसायासाठी अनेक खोल्यांची व्यवस्था
फैजपूर | प्रतिनिधी
फैजपूर पोलिस ठाण्याच्या हद्दीतील अकलूद गावाच्या शिवारात तापी नदीकाठी असलेल्या दुमजली घरात सुरू असलेल्या कथित कुंटणखान्यावर पोलिसांनी छापा टाकून चार महिलांची सुटका केली. गुरुवारी रात्री सुमारे ८ वाजता ही कारवाई करण्यात आली.
उपविभागीय पोलिस अधिकारी अनिल बडगुजर यांच्या मार्गदर्शनाखाली फैजपूर उपविभागीय पोलिस कार्यालय, यावल पोलिस ठाणे आणि निंभोरा पोलिस ठाण्यातील अधिकारी व अंमलदारांच्या संयुक्त पथकाने ही कारवाई केली.
पंटर पाठवून केली खात्री
अकलूद येथील मनीषा प्रकाश झोपे (वय ४५) ही महिला संबंधित ठिकाणी वेश्याव्यवसाय चालवत असल्याची माहिती पोलिसांना मिळाली होती. त्यानुसार पोलिसांनी नियोजनबद्ध पद्धतीने कारवाई करत प्रथम पंटर पाठवून माहितीची खातरजमा केली. माहितीची खात्री झाल्यानंतर पोलिस पथकाने घरावर छापा टाकला.
घरात अनेक खोल्यांची व्यवस्था
छाप्यादरम्यान दुमजली घरामध्ये वेश्याव्यवसायासाठी अनेक खोल्यांची व्यवस्था करण्यात आल्याचे पोलिसांच्या निदर्शनास आले. या कारवाईत वेश्याव्यवसायासाठी आणलेल्या चार महिलांची सुटका करण्यात आली.
यातील तीन महिला मूळच्या पश्चिम बंगालमधील असून सध्या भुसावळ येथे वास्तव्यास असल्याची माहिती पोलिसांनी दिली. तर एक महिला भुसावळ येथीलच असल्याचे समोर आले आहे.
या प्रकरणी कथित कुंटणखाना चालविणाऱ्या मनीषा झोपे हिच्याविरुद्ध कायदेशीर कारवाई करण्यात आली असून, प्रकरणाचा पुढील तपास पोलिसांकडून सुरू आहे.
