भुसावळ, (प्रतिनिधी) : चार महिन्यांपूर्वी १८ वर्षीय तरुणाला विवस्त्र करून मारहाण केल्याच्या प्रकरणात भुसावळ शहर पोलिसांनी दोघांना अटक केली आहे. समाजमाध्यमांवर अलीकडे व्हायरल झालेल्या व्हिडिओच्या आधारे तसेच पीडिताच्या आईने दिलेल्या पुरवणी जबाबानंतर मूळ गुन्ह्यात चार वाढीव कलमे समाविष्ट करण्यात आली आहेत.
२३ एप्रिल रोजी घडलेल्या या घटनेप्रकरणी २४ एप्रिल रोजी भुसावळ शहर पोलीस ठाण्यात गुन्हा दाखल करण्यात आला होता. सुरुवातीला BNS कलम ११८(१), ११५(२), ३२४(४) व ३(५) अन्वये कारवाई करण्यात आली होती. मात्र, घटनेशी संबंधित व्हिडिओ समाजमाध्यमांवर प्रसारित झाल्यानंतर पोलिसांनी त्याची तांत्रिक तपासणी केली. त्यासोबतच फिर्यादीच्या आईचा पुरवणी जबाब नोंदविण्यात आला. त्यानुसार मूळ गुन्ह्यात BNS कलम १४०(१), १२७(२) तसेच माहिती तंत्रज्ञान कायद्याचे कलम ६६(E) व ६७ समाविष्ट करण्यात आले.
प्रकरणात अपेक्षित कारवाई होत नसल्याने पीडित तरुणाच्या आईने १३ ऑगस्ट रोजी जिल्हाधिकारी यांची भेट घेतली होती. त्यानंतर पोलिसांच्या कारवाईला वेग आल्याचे दिसून आले. पोलिसांनी सिद्धेश महाडीक (१९) आणि सागर साळुंखे (१९) यांना अटक केली आहे. प्रकरणातील १७ वर्षे ११ महिन्यांचा मुख्य संशयित यापूर्वीच बाल सुधारगृहात हजर करण्यात आला आहे. अन्य १७ वर्षीय बालकाला आज बाल सुधारगृहात पाठवण्यात आले.प्रकरणाचा पुढील तपास भुसावळ शहर पोलीस ठाण्याचे पोलीस निरीक्षक महेश गायकवाड करीत आहेत.
