जळगाव, (प्रतिनिधी) : जळगाव जिल्हा क्रिकेट असोसिएशनतर्फे आयोजित १४ वर्षांखालील मुलांच्या जिल्हास्तरीय क्रिकेट निवड चाचणीत जिल्ह्यातील तब्बल ८८ खेळाडूंची प्राथमिक फेरीसाठी निवड करण्यात आली आहे. महाराष्ट्र क्रिकेट असोसिएशनच्या (MCA) मान्यतेने ही निवड चाचणी ‘अनुभूती निवासी स्कूल’च्या आंतरराष्ट्रीय दर्जाच्या क्रीडांगणावर पार पडली. या चाचणीत जिल्ह्यातील तब्बल ३०० बाल क्रिकेटपटूंनी उत्साहाने सहभाग नोंदवत एक नवा विक्रम प्रस्थापित केला.
जळगाव जिल्हा क्रिकेट असोसिएशनचे अध्यक्ष अतुल जैन यांच्या मार्गदर्शनाखाली या भव्य निवड चाचणीचे आयोजन करण्यात आले होते. निवड समितीचे अध्यक्ष संजय पवार आणि त्यांच्या सहकाऱ्यांनी अत्यंत पारदर्शक पद्धतीने खेळाडूंच्या कौशल्याचे निरीक्षण करून या ८८ खेळाडूंची प्राथमिक निवड केली. याप्रसंगी निवड समितीचे निमंत्रक तथा जिल्हा क्रिकेट असोसिएशनचे सचिव अरविंद देशपांडे उपस्थित होते. चाचणीच्या यशस्वी आयोजनासाठी संतोष बडगुजर, हितेश पटेल आणि सुयश बुरूकुल यांनी विशेष सहकार्य केले.
दरम्यान, प्राथमिक फेरीत निवड झालेल्या या ८८ खेळाडूंची विविध संघांमध्ये विभागणी केली जाणार असून, त्यांच्यात १५ ऑगस्ट ते १५ सप्टेंबर या महिनाभराच्या कालावधीत सामने खेळवले जाणार आहेत. हे सर्व सामने अनुभूती निवासी स्कूलच्या मैदानावरच होतील. या सामन्यांमधील कामगिरीच्या आधारे जळगाव जिल्ह्याचा मुख्य संघ तयार करण्यासाठी अंतिम २५ खेळाडूंची निवड केली जाईल, अशी माहिती असोसिएशनतर्फे देण्यात आली आहे.
