जालना, (विशेष प्रतिनिधी) : जालना शहर महानगर पालिकेत लुडबुड करणाऱ्या लोकप्रतिनिधीच्या नातेवाईकांना आयुक्त अंजली शर्मा यांनी चांगलाच चाप बसविला आहे. नगरसेवक आणि नगरसेविका म्हणून निवडून आलेल्या अधिकृत लोकप्रतिनिधी यांनीच महानगर पालिकेत वावर ठेवावा. त्यांचे पती, पत्नी भाऊ किंवा इतर नातेवाईक यांनी कामात हस्तक्षेप करू नये असे परिपत्रक शरम यांनी गुरुवारी काढले.
काय आहे परिपत्रकात?
जालना महानगरपालिका क्षेत्रामधून लोकप्रतिनिधी म्हणून केवळ निवडून आलेल्या अधिकृत नगरसेवक आणि नगरसेविका यांनाच महापालिकेच्या कामकाजात भाग घेण्याचा आणि प्रशासकीय निर्णय प्रक्रियेत मत मांडण्याचा कायदेशीर अधिकार आहे. परंतु असे निदर्शनास आले आहे की, काही लोकप्रतिनिधीचे नातेवाईक जसे की पती, पत्नी, वडील, मुले. भाऊ महापालिका मुख्यालय, प्रभाग कार्यालये आणि विकासकामांच्या ठिकाणी वावरत असून कामांत हस्तक्षेप करीत आहेत.
अशा व्यक्तींकडून स्वतः नगरसेवक असल्याचे भासवणे, तसा Social Media वर व इतर सामाजिक माध्यमांवर उल्लेख किंवा वावर करणे, शासकीय अधिकारी/कर्मचारी यांना नगरसेवक म्हणून फोन करणे व कार्यालयांना नगरसेवक अधिकारात भेटी देण्याचा प्रयत्न करणे, खाजगी कार्यालयीन ठिकाणी नगरसेवक म्हणून उल्लेख ठेवणे ई. बाबी निदर्शनास आणून देण्यात आलेल्या आहेत. सदर बाबी गंभीर स्वरूपाच्या असून महानगरपालिकेच्या बदनामीस व कारवाईस पात्र आहेत.
त्यानुषंगाने सर्व अधिकारी व कर्मचारी यांना कळविण्यात येते की, त्यांनी नगरसेवक व नगरसेविकांना व सन्मानाची वागणूक द्यावी. मात्र त्यांच्या नातेवाईकास दैनंदिन कामकाजात हस्तक्षेप करू देऊ नये, त्यांचे कोणतेही आदेश पाळू नयेत. तसेच त्यांच्या दबावास बळी पडून कायद्यास व नियमास अनुज्ञेय नसलेली कामे करू नयेत. तथापि अशा व्यक्ती नागरिक म्हणून आल्यास त्यांची कार्यालयीन कामे नियमानुसार करावीत.
सर्व सन्माननीय नगरसेवक/नगरसेविका, जालना महानगरपालिका यांना विनंती करण्यात येते की, आपण आपले नातेवाईक जसे की पती, पत्नी, भाऊ, वडील, मुले यांना उपरोक्त कार्यालयीन परिपत्रक निदर्शनास आणून द्यावे, जेणेकरून कार्यालयीन शिस्तीचा भंग होणार नाही व त्यामुळे महानगरपालिकेच्या प्रतिमेस हानी पोहोचणार नाही.
दरम्यान, मनपा आयुक्त अंजली शर्मा यांनी घेतलेल्या या निर्णयाचे सर्वसामान्य नागरिकांतून स्वागत केलं जात आहे.
