भुसावळ, (प्रतिनिधी) : भुसावळ शहर पोलीस स्टेशनच्या गुन्हे शोध पथकाने धडाकेबाज कारवाई करत मोटारसायकल चोरीच्या गुन्ह्याचा यशस्वी छडा लावला आहे. या कारवाईत एका सराईत चोरट्याला अटक करण्यात आली असून, त्याच्याकडून चोरीच्या एकूण ६ मोटारसायकली जप्त करण्यात आल्या आहेत. आरोपीने भुसावळ शहरासह जामनेर आणि अमळनेर पोलीस स्टेशनच्या हद्दीतूनही दुचाकी चोरल्याची कबुली दिली आहे.
विशाल राजेंद्र राठोड (वय ४६ वर्षे, रा. भिकनगाव, जि. खरगोन, मध्य प्रदेश) असे अटक करण्यात आलेल्या आरोपीचे नाव आहे. २३ जानेवारी २०२६ रोजी भुसावळ शहरातील झेडटीएस रोडवरील एमओएच पार्किंग शेडमधून विजय जगन्नाथ खडके यांची १५,००० रुपये किमतीची मोटारसायकल (क्र. MH-19-EK-2350) अज्ञात चोरट्याने लांबवली होती. याप्रकरणी भुसावळ शहर पोलीस ठाण्यात गुन्हा दाखल करण्यात आला होता.
गुन्ह्याचे गांभीर्य लक्षात घेऊन जळगावचे पोलीस अधीक्षक श्रीकांत धिवरे यांनी भुसावळ शहर पोलीस स्टेशनचे प्रभारी अधिकारी महेश गायकवाड यांना तपासाबाबत मार्गदर्शक सूचना दिल्या होत्या. त्यानुसार स्वतंत्र पथके तयार करून गुप्त माहिती संकलन, तांत्रिक विश्लेषण आणि सीसीटीव्ही फुटेजची तपासणी सुरू करण्यात आली.
दरम्यान, भुसावळ शहर पोलिसांच्या पथकाला गोपनीय बातमीदारामार्फत माहिती मिळाली की, या गुन्ह्यातील संशयित आरोपी चोपडा बसस्थानक परिसरात थांबलेला आहे. या माहितीच्या आधारे उपविभागीय पोलीस अधिकारी केदार बारबोले व पोलीस निरीक्षक महेश गायकवाड यांच्या मार्गदर्शनाखाली गुन्हे शोध पथकाने तातडीने सापळा रचून संशयित विशाल राठोड याला ताब्यात घेतले. त्याची कसून चौकशी केली असता, त्याने या गुन्ह्यासह इतर ५ अशा एकूण ६ मोटारसायकली चोरी केल्याची कबुली दिली.
ही उल्लेखनीय कामगिरी पोलीस अधीक्षक श्रीकांत धिवरे, अप्पर पोलीस अधीक्षक संदीप गावीत, उपविभागीय पोलीस अधिकारी केदार बारबोले यांच्या मार्गदर्शनाखाली पोलीस निरीक्षक महेश गायकवाड यांच्या नेतृत्वातील पथकातील पोलीस अंमलदार अब्दुल रज्जाक खान, सुबोध मोरे, राहुल बेहेनवाल, कुणाल सोनवणे आणि दीपक पाटील यांनी केली आहे.
