रावेर, (प्रतिनिधी) : रावेर जवळील अजंदा गावाच्या रेल्वे ब्रिजजवळ मजुरांचे आमिष दाखवून एका बांधकाम कंत्राटदाराला लुटणाऱ्या तीन संशयितांना रावेर पोलिसांनी अत्यंत शिताफीने २४ तासांच्या आत अटक केली आहे. आरोपींकडून गुन्ह्यात वापरलेली मोटारसायकल आणि मोबाईल जप्त करण्यात आला असून, न्यायालयाने त्यांना ८ जुलै २०२६ पर्यंत पोलीस कोठडी सुनावली आहे.
मिळालेल्या माहितीनुसार, फिर्यादी जामीर शेख अमान (वय ४१, रा. फारुकी आझम कॉलनी, विवरे बु॥, ता. रावेर) हे बांधकाम ठेकेदार आहेत. कामासाठी मजुरांची गरज असल्याने, मुस्तकीम नावाच्या व्यक्तीने त्यांना मजूर मिळवून देण्याचे आश्वासन दिले होते. ४ जुलै रोजी मुस्तकीमने फिर्यादींना विवरे येथे बोलावून घेतले आणि ‘मजूर अजंदा गावी कामावर गेले आहेत, आपण तिथे जाऊन त्यांना आणू’ असे सांगून अजंदा रेल्वे पुलाजवळ नेले.
तेथे आधीच पांढऱ्या रंगाच्या ॲक्टिव्हा गाडीजवळ दोन इसम उभे होते. तिथे पोहोचताच एका आरोपीने फिर्यादीच्या गळ्यावर चाकू ठेवून पैशांची मागणी केली. फिर्यादीकडे केवळ ५०० रुपये रोख होते, ते आरोपींनी हिसकावून घेतले. एवढ्यावरच न थांबता आरोपींनी फिर्यादीचा मोबाईल फोन जबरदस्तीने घेत त्यांचा फोन पे (PhonePe) चा पिन मिळवला. त्यानंतर वेगवेगळ्या खात्यांवर तब्बल ८०,०००/- रुपये ऑनलाईन ट्रान्सफर करून घेतले. या प्रकरणी रावेर पोलीस ठाण्यात गुन्हा दाखल करण्यात आला होता.
गुन्ह्याचा तपास करत असताना पोलिसांनी अजंदा गाव व परिसरातील सीसीटीव्ही फुटेज तपासले, परंतु रात्रीची वेळ असल्याने आरोपींचे चेहरे स्पष्ट दिसत नव्हते. दरम्यान, रावेर पोलीस स्टेशनचे पोलीस निरीक्षक संदीप पाटील यांना आरोपींच्या गाडीबाबत अत्यंत गोपनीय आणि खात्रीशीर माहिती मिळाली. या माहितीच्या आधारे रावेर पोलीस स्टेशनच्या डीबी पथकाने तात्काळ सापळा रचून संशयित मुस्तकीम याला ताब्यात घेतले. त्याची कसून चौकशी केली असता त्याने गुन्ह्याची कबुली दिली.
पोलिसांनी या प्रकरणी खालील तीन जणांना अटक केली आहे. यात १) शेख मुस्तकीम शेख अकील (वय २२ वर्षे, रा. फतेह नगर, रावेर), २) शेख मोईन शेख नईम (वय १९ वर्षे, रा. खिरडी रोड, विवरे), ३) फैजल बेग हिदायत बेग (वय १९ वर्षे, रा. शंकर प्लॉट, रावेर) यांचा समावेश आहे. यातील शेख मोईन शेख नईम हा सराईत गुन्हेगार असून, त्याच्यावर रावेर पोलीस ठाण्यात यापूर्वीही अशाच प्रकारे लोकांना लुटल्याचे गुन्हे दाखल आहेत. आरोपींकडून गुन्ह्यात वापरलेली मोटारसायकल आणि मोबाईल असा मुद्देमाल जप्त करण्यात आला आहे. या टोळीकडून आणखीही अनेक लुटीचे गुन्हे उघडकीस येण्याची शक्यता पोलिसांनी वर्तवली आहे.
ही कारवाई पोलीस अधीक्षक श्रीकांत धिवरे, अप्पर पोलीस अधीक्षक संदीप गावीत, आणि फैजपूर विभागाचे पोलीस उपअधीक्षक अनिल कढजकर यांच्या मार्गदर्शनाखाली रावेरचे पोलीस निरीक्षक संदीप पाटील, पो.उप.निरीक्षक मनोज महाजन, पो.उप.निरीक्षक तुषार पाटील, तसेच डीबी पथकातील समाधान ठाकूर, विशाल पाटील, प्रमोद पाटील, श्रीकांत चव्हाण आणि सुकेश तडवी यांनी केली आहे. गुन्ह्याचा पुढील तपास पो.उप.निरीक्षक मनोज महाजन करत आहेत.
