जळगाव, (प्रतिनिधी) : पाचोरा तालुक्यातील लोहारा येथील रहिवाशी डॉ. प्रितेश गणेश चौधरी यांना अमृता फडणवीस यांच्या दिव्याज फाउंडेशन तर्फे दिला जाणारा प्रतिष्ठेचा ‘नियतीचे चक्र’ हा पुरस्कार देऊन सन्मानित करण्यात आले.
प्रतिकूल परिस्थितीतून वाटचाल करत यश संपादन करणाऱ्या महाराष्ट्रातील काही निवडक व्यक्तींना हा मानाचा पुरस्कार दिला जातो. २०२६ सालच्या या पुरस्कारासाठी लोहारा येथील रहिवासी डॉ. प्रीतीश गणेश चौधरी यांच्या कार्याची दखल घेत मुख्यमंत्र्यांच्या वर्षा या निवासस्थानी त्यांना हा पुरस्कार देण्यात आला.
दिनांक २१ जून रोजी वर्षा या मुख्यमंत्र्यांच्या शासकीय निवासस्थानी भारतीय जैन संघटना व दिव्याच फाउंडेशन च्या वतीने या सोहळ्याचे आयोजन करण्यात आले होते. या कार्यक्रमाला मुख्यमंत्री देवेंद्र फडणवीस फाउंडेशनच्या अध्यक्षा अमृता फडणवीस भारतीय जैन संघटनेचे अध्यक्ष शांतीलालजी मुथा आदी उपस्थित होते.
डॉ. प्रीतीश चौधरी हे दादाश्री विश्व ग्रुप चे संस्थापक अध्यक्ष असून या संस्थेतर्फे अनेक सामाजिक शैक्षणिक व वैद्यकीय क्षेत्रात उल्लेखनीय कार्यक्रम आयोजित करणे बेरोजगारांना रोजगाराच्या संधी उपलब्ध करून देणे यासारख्या उल्लेखनीय कार्याची दखल घेत त्यांना हा मानाचा पुरस्कार देण्यात आला.
या पुरस्काराने अधिक काम करण्याचे बळ मिळेल व समाजातील शोषित वंचित घटकांना न्याय देण्यासाठी कटिबद्ध राहता येईल असे डॉ. प्रितेश चौधरी यांनी सांगितले.
