जळगाव, (प्रतिनिधी) : जामनेर पंचायत समिती कार्यालयातील कंत्राटी तांत्रिक सहाय्यक सागर अशोक नावकर (वय ३२, रा. गणपतीनगर, तळेगाव, ता. जामनेर) याला सिंचन विहिरीचे पुढील अनुदान मिळवून देण्याच्या मोबदल्यात ३० हजार रुपयांची लाच मागितल्याप्रकरणी लाचलुचपत प्रतिबंधक विभागाने (ACB) निष्पन्न केले असून, त्याच्याविरुद्ध जामनेर पोलीस ठाण्यात गुन्हा दाखल करण्याचे कामकाज सुरू आहे.
मिळालेल्या माहितीनुसार, मूळ तक्रारदार यांची जामनेर शिवारात शेती असून, त्यांना सन २०२१-२२ व २०२२-२३ या वर्षात महात्मा गांधी राष्ट्रीय ग्रामीण रोजगार हमी योजनेअंतर्गत (मागासवर्गीय घटक) पंचायत समिती, जामनेर यांच्याकडून सिंचन विहीर मंजूर झाली होती. या प्रस्तावित विहिरीची स्थळपाहणी करण्यापूर्वी संशयित लोकसेवक सागर नावकर याने तक्रारदाराकडून गावातील रोजगार सेवकामार्फत ३० हजार रुपये स्वीकारून स्थळपाहणी केली होती. त्यानंतर तक्रारदाराला वेळोवेळी ६०,९६६/- रुपयांचे अनुदान मिळाले.
विहिरीचे उर्वरित अनुदान मिळवण्यासाठी तक्रारदार यांनी सागर नावकर याची भेट घेतली असता, त्याने “तुम्ही विहिरीचे ठिकाण बदलले आहे, त्यामुळे तुम्हाला पैसे मिळणार नाहीत. जर पुढील अनुदान पाहिजे असेल तर ३० हजार रुपये द्यावे लागतील,” अशी लाचेची मागणी केली. लाच देण्याची इच्छा नसल्याने तक्रारदाराने ६ एप्रिल २०२६ रोजी लाचलुचपत प्रतिबंधक विभाग, जळगाव यांच्याकडे रीतसर तक्रार नोंदवली होती.
या तक्रारीच्या अनुषंगाने एसीबीच्या पथकाने ६ एप्रिल, ९ एप्रिल आणि १४ मे २०२६ रोजी लाचेच्या मागणीची पडताळणी केली. या पडताळणी कारवाईदरम्यान संशयित लोकसेवक सागर नावकर याने शासन योजनेअंतर्गत मंजूर सिंचन विहिरीचे काम करण्यासाठी पुढील अनुदान मिळवून देण्याच्या मोबदल्यात पंचांसमक्ष ३० हजार रुपयांची लाच मागितल्याचे स्पष्ट झाले. यावरून आज २२ जून २०२६ रोजी त्याच्याविरुद्ध जामनेर पोलीस स्टेशन येथे गुन्हा दाखल करण्याची प्रक्रिया सुरू करण्यात आली आहे.
ही कारवाई ला.प्र.वि. नाशिक परिक्षेत्राचे पोलीस अधीक्षक भारत तांगडे, अप्पर पोलीस अधीक्षक माधव रेड्डी, सुनील दोरगे यांच्या मार्गदर्शनाखाली, जळगाव एसीबीचे पोलीस उपअधीक्षक योगेश ठाकूर (पर्यवेक्षण व तपास अधिकारी), सापळा अधिकारी पोलीस निरीक्षक रेश्मा आवतारे (ला.प्र.वि. नंदुरबार, कॅम्प-जळगाव) आणि सापळा पथकातील पोलीस निरीक्षक हेमंत नागरे, सुरेश पाटील, राकेश दुसाने, प्रदिप पोळ, व भूषण पाटील यांच्या पथकाने केली आहे.
