जळगाव, (प्रतिनिधी) : जळगाव जिल्हा पोलीस अधीक्षक श्रीकांत धिवरे यांना मिळालेल्या गुप्त माहितीच्या आधारे, पारोळा परिसरात बेकायदेशीररीत्या साठवून ठेवलेल्या रसायनावर पोलिसांनी मोठी कारवाई केली आहे. राष्ट्रीय महामार्ग क्र. ५३ लगत म्हसवे शिवारात टाकलेल्या या छाप्यात एकूण ९ लाख ३२ हजार १२५ रुपये किमतीचा मुद्देमाल जप्त करण्यात आला असून, एका संशयिताविरुद्ध गुन्हा दाखल करण्यात आला आहे.
मिळालेल्या माहितीनुसार, म्हसवे शिवारातील रामदेव राजस्थानी चौधरी हॉटेलच्या पाठीमागे दिनेश पोपटराव पाटील (वय ४३, रा. पारोळा) हा इसम ‘सोडियम बाय सल्फेट’ या रसायनाचा बेकायदेशीर साठा करून तो काळ्या बाजारात विकण्याच्या उद्देशाने बाळगत होता. हे रसायन मानवी जीवनाला व मालमत्तेला धोकादायक ठरेल अशा असुरक्षित पद्धतीने साठवले होते. या घटनेचे गांभीर्य ओळखून पोलीस अधीक्षक श्रीकांत धिवरे यांच्या मार्गदर्शनाखाली पारोळा पोलीस स्टेशनच्या पथकाने सोमवारी, ११ मे रोजी या ठिकाणी छापा टाकला.
या कारवाईत पोलिसांनी खालील मुद्देमाल जप्त केला आहे:
४.५० लाख रुपये किमतीचा टाटा कंपनीचा १२ चाकी टँकर.
सुमारे ३३,७५० लिटर रासायनिक द्रव (किंमत अंदाजे ४.४२ लाख रुपये).
७ प्लॅस्टिक टाक्या, जमिनीवरील जुना टँकर आणि १५ लहान टाक्या.
एक मोटारसायकल, विवो कंपनीचा मोबाईल आणि १ HP ची मोटार.
या प्रकरणी आरोपी दिनेश पाटील याच्याविरुद्ध पारोळा पोलीस स्टेशनमध्ये गुन्हा दाखल करण्यात आला आहे. या गुन्ह्याचा पुढील तपास सपोनि योगेश महाजन करत आहेत.
