जळगाव, (प्रतिनिधी) : दि इन्स्टिट्यूट ऑफ चार्टर्ड अकाउंटंट्स ऑफ इंडियाच्या (ICAI) जळगाव शाखेमार्फत आयोजित तीन दिवसीय ‘आर्टिफिशियल इंटेलिजन्स (AI CA) लेव्हल १ सर्टीफिकेशन कोर्स’ नुकताच यशस्वीरित्या संपन्न झाला. १ ते ३ मे २०२६ दरम्यान चाललेल्या या प्रशिक्षणात जळगाव व परिसरातील ६० हून अधिक सी.ए. सभासदांनी सक्रिय सहभाग नोंदविला.
आजच्या डिजिटल युगात चार्टर्ड अकाउंटंट्सनी नवीन तंत्रज्ञानाशी सुसंगत राहणे आवश्यक असल्याचे सांगत, शाखेचे अध्यक्ष सी.ए. रोशन रुणवाल यांनी प्रास्ताविकात या कोर्सचे महत्त्व विशद केले. “एआय हे भविष्यातील प्रभावी साधन असून यामुळे व्यावसायिक कार्यक्षमतेत मोठी वाढ होईल,” असा विश्वास त्यांनी व्यक्त केला. या तीन दिवसीय प्रशिक्षणासाठी नाशिकचे सी.ए. राहुल बजाज, नागपूरचे सी.ए. शुभम पटेल व सी.ए. राघव मुंदडा यांनी तज्ज्ञ मार्गदर्शक म्हणून काम पाहिले.
पहिल्या दिवशी सी.ए. राहुल बजाज यांनी एआयची मूलभूत संकल्पना आणि ऑडिट क्षेत्रातील वापराबाबत मार्गदर्शन केले. तर दुसऱ्या दिवशी सी.ए. शुभम पटेल यांनी प्रगत एआय टूल्स, ऑटोमेशन आणि डेटा ॲनालिटिक्सचे प्रत्यक्ष प्रात्यक्षिक दाखवले. आणि तिसऱ्या दिवशी सी.ए. राघव मुंदडा यांनी रिअल-लाईफ केस स्टडीज आणि दैनंदिन कामात एआय ॲप्लिकेशन्सचा समावेश कसा करावा, यावर सविस्तर भाष्य केले.
प्रत्यक्ष सराव आणि प्रश्नोत्तरांच्या सत्रांमुळे सहभागी सभासदांमध्ये मोठा उत्साह दिसून आला. या उपक्रमामुळे जळगावातील सी.ए. व्यावसायिकांना आधुनिक तंत्रज्ञानाची ओळख झाली असून, त्यांच्या व्यावसायिक गुणवत्तेत भर पडणार आहे.
