जळगाव (हेमंत पाटील) : राज्याचे पाणीपुरवठा व स्वच्छता मंत्री तथा जळगाव जिल्ह्याचे पालकमंत्री ना. गुलाबराव पाटील यांचे सुपुत्र आणि जिल्हा परिषदेचे माजी सदस्य प्रताप गुलाबराव पाटील यांचा आज वाढदिवस. मात्र, यंदाचा हा वाढदिवस केवळ शुभेच्छांचा वर्षाव ठरणार नसून, त्यांच्या आगामी राजकीय वाटचालीसाठी अत्यंत महत्त्वाचा मानला जात आहे. आगामी विधान परिषद निवडणुकीसाठी प्रताप पाटील यांचे नाव आघाडीवर असून, त्यांना उमेदवारीचे ‘बर्थडे गिफ्ट’ मिळणार का? याकडे संपूर्ण जिल्ह्याचे लक्ष लागले आहे.
प्रताप पाटील यांनी ग्रामपंचायतीपासून जिल्हा परिषद सदस्य म्हणून काम करताना आपल्या कामाचा ठसा उमटवला आहे. केवळ ‘मंत्र्यांचा मुलगा’ ही ओळख मर्यादित न ठेवता, त्यांनी ग्रामीण भागात स्वतःचे स्वतंत्र वलय निर्माण केले आहे. मतदारसंघातील लहानांपासून थोरांपर्यंत त्यांचा थेट संवाद असतो. कार्यकर्त्याच्या घरातील आनंद असो वा दुःख, प्रताप पाटील तिथे हजर असतातच. हीच ‘आपुलकी’ त्यांच्या लोकप्रियतेचे मुख्य कारण ठरली आहे.
आरोग्य सेवा आणि तरुणाईची साथ..
संकटकाळात किंवा वैद्यकीय मदतीची गरज असताना प्रताप पाटील धावून जातात. आरोग्य सेवेतील त्यांच्या विशेष योगदानामुळे अनेक गरजू कुटुंबांना आधार मिळाला आहे. तसेच आक्रमक कार्यशैली आणि संयमी स्वभाव यामुळे तरुणांमध्ये त्यांची मोठी क्रेझ आहे. जिल्ह्यातील युवा वर्गाचे संघटन करण्यात त्यांचा मोठा वाटा आहे.
जागेचा पेच आणि ‘फिक्स’ उमेदवारीची चर्चा..
सध्या विधान परिषदेच्या जागेसाठी महायुतीमध्ये खलबतं सुरू आहेत. या जागेवर भारतीय जनता पक्षाने दावा केला असला तरी, पक्षश्रेष्ठींच्या चर्चेअंती ही जागा शिवसेना (शिंदे गट) कडे गेल्यास प्रताप पाटील यांचे नाव निश्चित मानले जात आहे. त्यांचा दांडगा जनसंपर्क आणि तळागाळातील पकड पाहता, ते निवडून येण्याची क्षमता असलेले उमेदवार म्हणून ओळखले जातात.
“प्रतापराव केवळ तरुण तडफदार नेते नाहीत, तर ते कार्यकर्त्यांच्या कुटुंबातील सदस्य आहेत. त्यांच्या वाढदिवसानिमित्त त्यांना विधान परिषदेची उमेदवारी मिळावी, अशी भावना कार्यकर्ते व्यक्त करत आहेत.
