जळगाव, (प्रतिनिधी) : गोदावरी फाउंडेशन संचलित गोदावरी अभियांत्रिकी व तंत्रनिकेतन महाविद्यालयात डॉ. बाबासाहेब आंबेडकर टेक्नॉलॉजिकल युनिव्हर्सिटी, आयक्यूएसी आणि आयआयसी यांच्या संयुक्त विद्यमाने आयोजित ‘आयसीआरईएसटी-२०२६’ या आंतरराष्ट्रीय परिषदेचे उद्घाटन २१ एप्रिल २०२६ रोजी उत्साहात संपन्न झाले. या परिषदेत देशभरातून एकूण ९८ संशोधन पेपर सादर करण्यात आले.
कार्यक्रमाचे उद्घाटन गोदावरी फाउंडेशनचे अध्यक्ष डॉ. उल्हास पाटील यांच्या हस्ते करण्यात आले. यावेळी व्यासपीठावर मुख्य वक्त्या म्हणून अमेटी युनिव्हर्सिटी (नोएडा) येथील डॉ. बेदात्री मौलिक, महाविद्यालयाचे प्राचार्य डॉ. विजयकुमार पाटील, समन्वयक प्रा. महेश एच. पाटील, उपसमन्वयक डॉ. अतुल बर्हाटे, अधिष्ठाता डॉ. तुषार कोळी, डॉ. हेमंत इंगळे व सर्व विभाग प्रमुख उपस्थित होते.
संशोधन ही काळाची गरज: डॉ. विजयकुमार पाटील
प्रास्ताविकात प्राचार्य डॉ. विजयकुमार पाटील यांनी पाहुण्यांचे स्वागत केले. त्यांनी नमूद केले की, “आजच्या युगात ५जी, ६जी, जनरेटिव्ह एआय आणि एज कॉम्प्युटिंग या क्षेत्रांत संशोधनाला मोठी संधी आहे. महाराष्ट्र, गुजरात, उत्तर प्रदेश आणि मध्य प्रदेशातून आलेले संशोधक या व्यासपीठावरून आपले विचार मांडत आहेत. एआयसीटीईच्या विविध पोर्टल्स आणि स्टार्टअप बुटकॅम्पमुळे विद्यार्थ्यांमध्ये नाविन्यपूर्ण वृत्ती वाढत आहे.”
विकसित भारतासाठी योगदान आवश्यक: डॉ. उल्हास पाटील
अध्यक्षीय भाषणात डॉ. उल्हास पाटील यांनी दरवर्षी वाढणाऱ्या संशोधन पेपर्सच्या संख्येबद्दल समाधान व्यक्त केले. “विकसित भारताचे स्वप्न पूर्ण करण्यासाठी प्रत्येकाचे संशोधनात्मक योगदान गरजेचे आहे,” असे सांगत त्यांनी सहभागी संशोधकांना शुभेच्छा दिल्या.
शाखानिहाय संशोधन पेपर्सचे सादरीकरण
या परिषदेत ऑनलाइन पद्धतीने विविध शाखांमधून संशोधन सादर करण्यात आले:
संगणक विभाग: ४९ पेपर्स, इलेक्ट्रॉनिक्स व टेलिकम्युनिकेशन: २२ पेपर्स, मेकॅनिकल: ११ पेपर्स, इलेक्ट्रिकल: ११ पेपर्स, बेसिक सायन्सेस: ५ पेपर्स. या सादरीकरणासाठी डॉ. मनोज पाटील, डॉ. अभिजीत जाधव, डॉ. प्रशांत पाईकराव, डॉ. राजेंद्र खडायते, डॉ. कृष्णा श्रीवास्तव आणि डॉ. व्यंकटेश धोटे यांनी तज्ञ परीक्षक म्हणून काम पाहिले. निवडक शोधनिबंध ‘स्कोपस इंडेक्स’ पब्लिकेशनमध्ये प्रसिद्ध केले जाणार आहेत.
कार्यक्रमाचे यशस्वी नियोजन प्राचार्य डॉ. विजयकुमार पाटील यांच्या मार्गदर्शनाखाली प्रा. महेश पाटील व डॉ. अतुल बर्हाटे यांनी केले. या सोहळ्यासाठी डॉ. वर्षा पाटील, डॉ. केतकी पाटील, डॉ. वैभव पाटील व डॉ. अनिकेत पाटील यांचे सहकार्य लाभले. सूत्रसंचालन व आभार प्रदर्शन प्रा. हर्षल पाटील यांनी केले.
